Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 181 Hüküm no: 174 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın ev, bağ ve bostanını Şiro v. İstati’ye satması Vilâyet-i Rumeli’nde Gerbeniş kazâsına tâbi‘ Martiye nâm karye sükkânından Mehmed Beşe b. Abdullâh nâm kimesne meclis-i şer‘de işbu râfi‘ü’s-sifri’ş-şer‘î Şiro v. İstati nâm zimmî muvâcehesinde ikrâr ve takrîr-i kelâm edip bey‘-i câ’i’z-zikrin sudûruna değin zabt ve taht-ı tasarrufumda olan emlâkimden karye-i mezbûrede vâki‘ bir tarafdan Yani v. Kokna mülkü ve bir tarafdan Yani Acemî nâm zimmî mülkü ve iki tarafdan tarîk-i âm ile mahdûd üç bâb fevkānî ve iki tahtânî odaları ve havluyu müştemil mülk menzilimi cümle tevâbi‘ ve levâhıkı ile menzil-i mezbûr kurbunda vâki‘ etrâf-ı erba‘ası Yani v. Kokna ve Kaliko nâm zimmî bağları ve tarîk-i âm ile mahdûd iki kıt‘a mülk bağımı cümle tevâbi‘ ve levâhıkı ile ve yine karye-i mezbûre çeşmesi kurbunda vâki‘ bir tarafdan Yani v. Komino bostanı ve bir tarafdan Kaliko nâm zimmî bostanı ve bir tarafdan Dimitri v. Andriye bostanı ve taraf-ı âharı tarîk-i âm ile mahdûd mülk bostanımı dahi müşterî-i merkūm Şiro’ya on bin nakd-i râyic fi’l-vakt akçeye bi safkatin vâhidetin tarafeynden îcâb ve kabûlü hâvî bey‘-i bâtt-ı kat‘î ile bâtten bey‘ edip ol dahi minvâl-i muharrer üzre iştirâ ve kabûl eyleyip semeni olan mezbûrü’n-na‘t on bin akçeyi müşterî-i mezbûr Şiro yedinden tamamen alıp kabz eyledikden sonra menzil-i mahdûd-ı mezkûru ve iki kıt‘a bağımı ve iki kıt‘a bostanı mahallinde ahz ü kabz ve zabt ve tasarrufa merkūm Şiro’yu taraf[ım]dan taslît eyledim min ba‘d alâka ve medhalim yokdur, merkūm Şiro’nun emlâk-i müşterâsı olmuşdur, keyfe mâ yeşâ’ mutasarrıf [olsun] dedikde mâ hüve’l-vâki‘ kayd şüd. Fi’l-yevmi’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Beşe b. Hasan er-Râcil, Hüseyin Beşe Kalaycı, Ahmed Beşe [b.] Ali el-Attâr, Hüseyin Çelebi b. Ali ve gayruhüm mine’l-hâzırîn.