Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 182 Hüküm no: 175 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi’nin vefat eden Ayşe bt. Şeyh Mahmud’a olan borcunu vasîsine ödemesi Fi’l-asl vilâyet-i Rumeli’nde Göllükesri kazâsına tâbi‘ Hatoneşte nâm karyeden olup hâlâ medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de mütemekkin olan râfi‘ü’l-kitâb Nureddin Çelebi b. Mustafa b. Mustafa nâm kimesne meclis-i şer‘de Mustafa Çelebi b. (…?) mahzarında üzerine takrîr-i da‘vâ edip medîne-i mezbûrede Zeyneb Hâtun mahallesinde sâkine iken bundan akdem vefât eden Ayşe b. eş-Şeyh Mahmud’un cihet-i karz-ı şer‘îden mezbûr Mustafa Çelebi zimmetinde üç aded sikke-i hasene beş aded riyâlî guruş-ı kebîr hakkı olup kable’l-istîfâ fevt olup verâseti zî-rahm cihetinden bana münhasıra olduğunu hâl-i hayâtında ve kemâl-i sıhhatinde huzûr-ı müslimînde ikrâr ve istişhâd edip ikrâr-ı mezkûru üzerine musırran fevt olmağla mecmû‘ muhallefâtı bi’l-irsi’ş-şer‘î bana isâbet ve intikāl etmişiken meblağ-ı mezbûru merkūm Mustafa Çelebi’den taleb eylediğimde edâdan imtinâ‘ eyler hâlâ suâl olunup alıverilmek matlûbumdur deyicek gıbbe’s-suâl mezbûr Mustafa Çelebi cihet-i mezbûreden müteveffât-ı mezbûre Ayşe Hâtun’un zimmetinde üç aded sikke-i hasene ve beş kıt‘a riyâlî guruş hakkı olduğunu ikrâr, lâkin müdde‘î-i mezbûrun vech-i mübeyyen üzre verâsetini inkâr ile cevâb verme[ğin] müdde‘î-i mezbûrdan müdde‘âsını mübeyyine beyyine taleb olundukda, medîne-i mezbûrede Çavuş Kasım mahallesinde udûl-i ricâlden Mehmed Efendi b. eş-Şeyh Ali ve Arslan b. Hasan ve Mehmed Çelebi b. Ali ve Mustafa b. Yusuf nâm kimesneler li ecli’ş-şehâde makām-ı kazâya hâzırûn olup istişhâd olunduklarında, fi’l-hakīka müteveffât-ı mezbûre Ayşe Hâtun hâl-i hayâtında ve kemâl-i sıhhatinde mezbûr Nurullah Çelebi muvâcehesinde benim verâsetim zî-rahm cihetinden Nurullah Çelebi’ye münhasıradır, vâris-i âhar yokdur deyû bezim huzûrumuzda ikrâr ve mezbûr Nurullah Çelebi dahi tasdîk edip müteveffât-ı mezbûre ikrâr-ı mezkûr üzerine musırran fevt olmağla mecmû‘ muhallefâtı bi’l-irsi’ş-şer‘î müdde‘î-i mez[bûr] Nurullah Çelebi’ye münhasır olup vâris-i âhar olduğu ma‘lûmumuz değildir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle müdde‘î-i mezbûrun verâsetine hükm ve meblağ-ı mârrü’z-zikri dahi edâ ve teslîme merkūm Mustafa Çelebi’ye tenbîh birle mâ hüve’l-vâki‘ kayd şüd. Tahrîren fi’l-yevmi’t-tâsi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Ali Beşe b. Mehmed, Mehmed Beşe b. Musa, Hasan b. Abdullah ed-Dellâl, Halil Beşe b. Mehmed, Mustafa b. Hasan ve gayruhüm mine’l-hâzırîn.