Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 183 Hüküm no: 176 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori ve Panayot ile Polihroni v. Panayot’un alacak davasında sulh olması Fi’l-asl vilâyet-i Rumeli’nde Mizistre kazâsına tâbi‘ Mahor nâm karye sükkânından olup hâlâ mahmiye-i İstanbul’da Unkapanı kurbunda mütemekkin değirmenci tâifesinden Todori v. Panayot v. Dimitri nâm karındaşlar mahfil-i kazâda bostancı tâifesinden işbu râfi‘ü’l-vesîka Polihroni v. Panayot nâm zimmî muvâcehesinde her biri ikrâr ve takrîr-i kelâm edip bundan akdem merkūm Polihroni’ye ikimiz ma‘an bir zenbil içinde elli iki bin akçemizi alâ tarîki’l-vedî‘a merkūmun yedine vaz‘ ve teslîm etmişdik ol dahi kabz ve tesellüm eyledikden sonra hâlâ meblağ-ı mezbûru merkūm Polihroni’den taleb eylediğimizde meblağ-ı mezbûru merkūm Polihroni bi’l-külliyye inkâr ile cevâb vermeğin beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip meblağ-ı mezbûr da‘vâsından bizi yirmi bin akçe üzerine inşâ-i akd-i sulh eylediklerinde biz dahi sulh-i mezbûru kabûl ve bedel-i sulh olan yirmi bin akçeyi merkūm Polihroni yedinden tamamen alıp kabz edip meblağ-ı mezbûr da‘vâsından merkūm Polihroni’nin zimmetini ibrâ ve iskāt eyledik min ba‘d husûs-ı mezbûra müte‘allik mezbûr ile da‘vâ ve nizâ‘ımız yokdur dediklerinde gıbbe’t-tasdîki’ş-şer‘î mâ cerâ bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: El-Hâc berber Mustafa, Murad Beşe b. Abdullah, Cafer Beşe b. Abdullah, Mustafa Çelebi b. Osman, İsmail Çelebi b. Abdullah.