Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 183 Hüküm no: 177 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun bağını Rizo v. İstati’ye satması Vilâyet-i Rumeli’nde Yacağaç kazâsına tâbi‘ Matso nâm karyeden Yani v. Dimo zimmî meclis-i şer‘de işbu râfi‘ü’l-vesîka Rizo v. İstati nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden karye-i mezbûre bağları dâhilinde vâki‘ bir tarafdan Dimo Hartiya bağı ve bir tarafdan Yorgo Mahoşlar bağı ve tarafeyni vâdi ve tarîk-i âm ile mahdûd Aşağıki Bağlar demekle ma‘rûf mahalde tahmînen on çapalık bir kıt‘a mülk bağımı cemî‘ tevâbi‘ ve levâhıkı ile merkūm Rizo’ya üç bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bâtten bey‘ edip ol dahi vech-i muharrer üzre iştirâ ve kabûl eyledikden sonra semeni olan mezbûrü’n-na‘t üç bin akçeyi tamamen merkūm Rizo yedinden alıp kabz edip bağ-ı mahdûd-ı mezkûru mahallinde zabt ve tasarrufa tarafımdan merkūm Rizo’yu taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin Muhzır er-Râcil, Ali Beşe, Dilâver Muhzır er-Râcil, Ahmed Efendi el-Kassâm, Mehmed b. Mahmud Muhzır ve gayruhüm mine’l-hâzırîn.