Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 184 Hüküm no: 178 Orijinal metin no: [38a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgo’nun bağını Yano v. Yani’ye satması Fi’l-asl vilâyet-i Rumeli’nde Delvine kazâsına tâbi‘ Lefter nâm karyede sâkin Yani v. Yorgo nâm zimmî mahfil-i kazâda işbu râfi‘ü’s-sifri’ş-şer‘î Yano v. Yani nâm zimmî muvâcehesinde bi tav‘ihî ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden karye-i mezbûrda vâki‘ bir tarafdan Niko nâm zimmî bağına ve bir tarafdan kûha ve bir tarafdan Kiro v. Kontali bağına ve taraf-ı âharı tarîk-i âm ile mahdûd ve mümtâz olan bir kıt‘a mülk bağımı ve iki armud eşcârını ve sâir tevâbi‘ ve levâhıkı mezbûr Yano’ya bin sekiz yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh ile bâtten bey‘ , ol dahi minvâl-i muharrer üzre iştirâ ve ahz ü kabz [ve] zabt ve tasarrufa tarafımdan merkūm Yano’yu taslît eyledim min ba‘d benim alâka ve medhalim yokdur, müşterî-i mezbûr Yano’nun mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin Çelebi b. Ali, diğer Hüseyin b. Hasan, çukadâr Ali Beşe b. Emrullah, Mehmed Çelebi b. Hasan ve gayruhüm mine’l-hâzırîn.