Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 184 Hüküm no: 179 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Çelebi b. Mehmed’in, karısına ait sattığı malların parasını ödemesi gerektiği İşbu bâ‘isü’l-kitâb Fâtıma bt. Hüseyin nâm hâtun meclis-i şer‘de zevci Sâlih Çelebi b. Mehmed nâm râcil mahzarında üzerine takrîr-i da‘vâ edip bundan akdem zevcim mezbûr Sâlih Çelebi benden iki yüz guruş kıymetli yakut taşlı bir sorguç tepeliği ve buçuk vakıyye sîm raht kuşak [ve] bir baklava tepsisi ve ibrik ve iki sahanım ahz edip bey‘ ve semenlerini kendi mesârifine sarf ile istihlâk eylemişdir hâlâ suâl olunup alıverilmek matlûbumdur deyicek gıbbe’s-suâl mezbûr Sâlih Çelebi cevâbında fi’l-hakīka zevcem mezbûre Fâtıma’dan zikr olunan sorguç tepeliğini ve kuşağı alıp beş bin akçeye ve bin üç yüz akçeye kuşağı bey‘ ve semenini mesârifime sarf ile istihlâk eylemişdim bi hesâbı mezbûr altı bin üç yüz akçe zevcem müdde‘iye-i mezbûre Fâtıma’ya zimmetimde lâzımü’l-edâ deynimdir ve tepsiyi dahi odabaşıma baklava getirdip bir vechile zâyi‘ eylemişimdir, onun dahi kıymeti olan yüz elli akçeyi edâ ederim mâ‘adâyı almadım ve alanı dahi bilmem deyicek müdde‘iye-i mezbûre Fâtıma’dan müdde‘âsını mübeyyine beyyine taleb olundukda, ityân-ı beyyineden izhâr-ı acz ile istihlâf etmeğin mezbûr Sâlih Çelebi zikr olunan bir ibrik ve iki sahanı zevcesi mezbûre Fâtıma mülkünden almadığına ve aldırmadığına ve bir vechile ilmi olmadığına yemîn teklîf olundukda, ol dahi alâ vefki’l-mes’ûl yemîn billâhi te‘âlâ etmeğin ikrârı mûcebince altı bin dört yüz elli akçeyi mezbûr Fâtıma’ya edâ ve teslîm ile zevc-i merkūm Sâlih Çelebi ilzâm olunup ve mârrü’z-zikr ibrik ve sahanlar talebiyle zevc-i mezbûru bi gayrı vech rencîde ve mu‘ârazadan merkūme Fâtıma men‘ birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Veli Bey b. Ramazan Ser-bölük, Mahmud Efendi b. Muharrem, Seydi Beşe b. Hüseyin, Mehmed b. Ahmed ve gayruhüm mine’l-hâzırîn.