Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 185 Hüküm no: 180 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb Sultan Türbesi civarı mezar kazıcıların kethüdâlığına Hasan b. Hüdâverdi’nin tayini Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de hazret-i müşârün-ileyhin merkad-i şerîfi etrâfında olan mekābir-i müslimînin haffârlarından olup Hasan b. Mustafa ve Resul b. Mezid ve İsmail b. Şaban nâm kimesneler meclis-i şer‘-i şerîf-i lâzımü’t-teşrîfde, her biri takrîr-i kelâm ve ta‘bîr ani’l-merâm edip bundan akdem haffârlar üzerine kethüdâ olan Hasan [b.] Bâli mukaddemâ fevt olup sulbî kebîr oğlu Mehmed Çelebi kıbel-i şer‘den üzerimize kethudâ nasb ve ta‘yîn olunmuşidi el-hâletü hâzihî mezbûr Mehmed Çelebi dahi fevt olmağla yeri hâlî ve hizmeti mu‘attal kalmağın hâlâ cümlemizin a‘lemi ve husûs-ı mezbûrda üstâd olan hâzır bi’l-meclis Hasan b. Hüdâverdi nâm kimesne san‘at-ı merkūmede mâhir, mezarın sâhibine âlim olmağın müteveffâ-yı mezbûr yerine kıbel-i şer‘-i mutahhardan kendi rızâ ve hüsn-i ihtiyârımız ile üzerimize kethüdâ nasb ve ta‘yîn olunmak matlûbumuzdur dediklerinde hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi hâmilü’l-kitâb mezbûr Hasan’ı merkūmûn haffârlar üzerine kethüdâ nasb ve ta‘yîn buyurmağın ol dahi kabûl ve hıdemât-ı lâzımesini edâya müte‘ahhid olup mâ cerâ bi’l-ibtigā kayd şüd. Fi’l-yevmi’r-râbi‘ ve’l-ışrîn min Ramazâni’l-mübârek li sene isneteyn ve seb‘în ve elf. Şuhûdü’l-hâl: Kethüdâ Receb Bey, çukadâr Ali Beşe, Hüseyin b. Ali, Dilâver b. Abdullah, Mehmed Mahmud ve gayruhüm mine’l-hâzırîn.