Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 186 Hüküm no: 181 Orijinal metin no: [38b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf ev konusunda İshak Efendi b. Yusuf ile Mahmud Halife b. Mehmed’in sulh oldukları Mahmiye-i İstanbul hısnı ebvâbından Yenikapı dâhilinde Vâlide Sarayı semtinde Cafer Ağa mahallesi imâmı İshak Efendi b. Yusuf el-Kırımî meclis-i şer‘de medîne-i hazret-i Ebâ Eyyûb el-Ensârî -dâme fî rıdvâni’l-Bârî-’de Kara Süleyman Çelebi mahallesi imâmı sâhibü’l-kitâb mevlânâ Mahmud Halîfe b. Mehmed mahzarında ikrâr ve takrîr-i kelâm edip mahalle-i mezbûre sükkânından iken bundan akdem vefât eden eş-Şeyh Şaban nâm sâhibü’l-hayrât[’ın] lede’l-ahâlî ve’l-cîrân mülk menzilini vakf-ı sahîh ve lâzım ile vakf ve haps edip süknâsını kendiden sonra mahalle-i mezbûre imâmına şart ve ta‘yîn etmiş iken, babam müteveffâ-yı mezbûr menzil-i mezbûr sulehâya meşrûtadır deyicek kıbel-i şer‘den kendisine tevcîh ettirdip tasarruf üzre iken izn-i hâkim ve izn-i mütevellî ile mülkü olmak üzre beş bin akçe kıymetli binâ ihdâs etmişiken hâlâ fevt olmağla menzil-i mezbûr imâmete meşrûta idiğini merkūm Mahmud Halîfe yedinde olan vakfiye-i ma‘mûlün-bihâ mûcebince isbât ve menzil-i mezbûru şart-ı vâkıf üzre zabt eylediğinde ben dahi babamız müteveffâ-yı mezbûrun menzil-i mezbûrda mülkü olan binâsının kıymeti beş bin akçeyi mezbûr Mahmud Efendi’den taleb eylediğimde ol dahi binâ-i mezkûrda izn-i hâkim ve izn-i mütevellî olduğunu inkâr ve menzil-i mezbûru teslîmden ta‘allül etmekle beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûrumdan merkūm Mahmud Halîfe ile beni bin beş yüz fıddî nakd-i râyic fi’l-vakt akçeyi tamamen Mahmud Halîfe yedinden alıp kabz edip menzil-i mezbûrda babam müteveffâ-yı merkūmun mülkü olmak üzre ihdâs eylediği beş bin akçe binâ bahâsı da‘vâsından merkūm Mahmud Halîfe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâ[m] birle iskāt eyledim min ba‘d menzil-i mezkûra müte‘allik merkūm Mahmud Halîfe ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Efendi b. Süleyman, Diğer Mehmed Efendi b. Yusuf, Şaban Bey b. Mustafa, Ahmed b. Hamdi, Ali Beşe çukadâr.