Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 186 Hüküm no: 182 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcu Yorgi v. Tanaş’ın ortağı Aleksi v. Yani’nin hakkını vârislere ödemesi Fi’l-asl vilâyet-i Rumeli’nde Yenişehir kazâsına tâbi‘ Kardiçe nâhiyesinde vâki‘ Borça nâm karyeden olup bundan akdem mahmiye-i İstanbul hısnı ebvâbından Balatkapısı kurbunda Hamamcıoğlu nâm kimesnenin mumhânesinde mütemekkin iken mürd olan Aleksi v. Yani nâm hâlikin li ebeveyn karındaşı ve hasren vârisesi olan Agora bt. Yani nâm nasrâniyenin tarafından ikrâr-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân olan Panayot v. Yorgi ve Avi[r]o v. Yorgi nâm zimmîler şehâdetleri ile şer‘an vekâleti sâbite olan zevci Harişo v. Dimo nâm zimmî meclis-i şer‘de hâlik-i mezbûrun mumculuk san‘atında şerîki olan râfi‘ü’s-sifr Yorgi v. Tanaş nâm mumcu muvâcehesinde bi’l-vekâle ikrâr ve takrîr-i kelâm edip zevcim müvekkile-i mezbûrenin karındaşı olup hâlik olan Aleksi ile merkūm Yorgi san‘at-ı mezbûrede şerîkler olup asl-ı mâl şirketimden ve târih-i kitâba gelince hâlik-i mersûmun hissesine isâbet eden fâideden cem‘an yedi bin akçe mezbûr Yorgi’nin yedinde iken mersûm Aleksi mürd olmağın hâlâ meblağ-ı mersûm yedi bin akçeyi mezbûr Yorgi yedinden vekâlet-i mahkiyem hasebiyle ahz ü kabz edip zimmetinde mâl-ı şirketden ve fâideden bir akçe ve bir habbe kalmayıp husûs-ı mezbûra müte‘allik olan da‘vâdan merkūm Yorgi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm zevcim müvekkile-i mezbûre Agora’nın husûs-ı mezbûra müte‘allik merkūm Yorgi ile da‘vâ ve nizâ‘ı yokdur deyû bi’l-vekâle ikrâr edicek vekîl-i mezbûrun minvâl-i muharrer üzre ikrârını mezbûr Yorgi vicâhen ve şifâhen tasdîk ve tahkīk etmeğin mâ cerâ bi’l-ibtigā ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hüseyin Çelebi b. Ali, Mehmed b. Ahmed, Hasan Beşe b. Hüseyin, Dilâver Beşe b. Abdullah ve gayruhüm mine’l-hâzırîn.