Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 187 Hüküm no: 183 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf dükkânı kiralayanların dükkânın tamir masrafını bir başkasının üstlenmesine izin vermeleri Vilâyet-i Rumeli’nde Gerbeniş kazâsına tâbi‘ Kılzem? nâm karye zimmîlerinden Yorgi v. Dimitri nâm zimmî meclis-i şer‘-i hatîr-i lâzımü’t-tevkīrde sulbî kebîr oğlu bâ‘isü’l-vesîka Keretsi nâm zimmî muvâcehesinde ikrâr ve takrîr-i kelâm edip Havâss-ı Aliyye kazâsına tâbi‘ Azadlı nâm karyede vâki‘ inde’l-ahâlî ve’l-cîrân ma‘lûmetü’l-hudûd olup merhûm ( ) nâm sâhibü’l-hayrın evkāfından dükkân yerini, bundan akdem ben ve Yani ve diğer Yani nâm zimmîler evkāf-ı mezbûre mütevellîsi Halil Çelebi nâm kimesne[den] icâre-i ma‘lûme ve yevmî dörder akçe ücret-i müeccele ile istîcâr eylediğimizde ol dahi îcâr ve teslîm edip lâkin dükkân-ı merkūmu zikr olunan şerîklerim ile binâ ve ta‘mîre kādir olmadığımız ecilden oğlum merkūm Keretsi emrim ve izin ve icâzetim ile dükkân-ı mezbûra on bin fıddî nakd-i râyic fi’l-vakt akçe harc ve sarf edip dükkân-ı mezbûru ta‘mîr ve termîm etmeğin meblağ-ı mezbûr başdan bu âna gelince oğlum merkūm Keretsi’ye zimmetimde lâzımü’l-edâ ve vâcibü’l-kazâ deynim olmağla meblağ-ı mezbûru oğlum merkūm Keretsi’ye edâ ve teslîm edince dükkân-ı mezbûrdan hâsıl olan kirâya vaz‘-ı yed etmeyip oğlum mersûm Keretsi almak üzre kavl ü karâr ve ahd ü mîsâk eylemişdir deyicek gıbbe’t-tasdîk mâ hüve’l-vâki‘ kayd şüd. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hamza Efendi nâib-i recül, Kethüdâ Receb, Dilâver Muhzır, Mehmed muhzır ve gayruhüm mine’l-hâzırîn.