Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 188 Hüküm no: 184 Orijinal metin no: [39a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Liko’nun babasından miras evini amcasının oğlu İskoli v. Aleksandri’ye satması Havâss-ı Aliyye kazâsı a‘mâlinden Kemerli Belgrad nâm karye zimmîlerinden Yorgo v. Liko nâm zimmî meclis-i şer‘-i hatîr-i lâzımü’t-tevkīrde li ebeveyn ammisi oğlu İskoli v. Aleksandri muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup babam hâlik-i merkūm Liko’dan bi’l-irsi’ş-şer‘î nısfı bana ve nısf-ı bâ[kī]si ammim hâlik-i mersûm Aleksandri’nin oğlu merkūm İskoli’ye isâbet ve intikāl edip karye-i mezbûrede vâki‘ bir tarafdan Karaağaç ve bir tarafından Andriye mülkü ve tarafeyni vâdi ve tarîk-i âm ile mahdûd iki bâb fevkānî oda ve altında ahır ve samanlığı ve zât-ı eşcâr-ı müsmire ve gayrı müsmire bahçeyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık üç bin beş yüz fıddî nakd-i râyic fi’l-vakt akçeye ammim oğlu mesfûr İskoli’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan mezbûrü’n-na‘t üç bin beş yüz akçeyi tamamen ammimin oğlu merkūm İskoli yedinden alıp kabz eyledim ba‘de’l-yevm hudûd-ı mezkûr ile mahdûd olan menzil-i merkūm ammim oğlu mersûm İskoli’nin mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ cerâ bi’l-ibtigā sebt olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Muharrem Efendi nâib-i recül, Hüseyin b. Hasan, Mehmed b. Mahmud, Dilâver muhzır ve gayruhüm mine’l-hâzırîn.