Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 296 Hüküm no: 331 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nasuh b. el-Hâc Durmuş’un, vârislerinin borçlu olan Musa b. Abdullah ile olan davalarında sulh olduğu Vilâyet-i Anadolu’da Şuhud kazâsına tâbi‘ Kozviran nâm karye ahâlîsinden olup bundan akdem vefât eden Nasuh b. el-Hâc Durmuş nâm kimesnenin verâseti zevcesi Fâtıma bt. Bektaş ile vâlidesi Melek nâm hâtun ve li ebeveyn karındaşı Ali nâm kimesneye münhasıra olduğu şer‘an zâhir ve mütehakkik oldukdan sonra mezbûr Ali asâleten ve mezbûretân Fâtıma ve Melek taraflarından husûs-ı âti’l-beyâna vekîl olduğu kazâ-i mezbûra tâbi‘ İlyaslı nâm karye sükkânından olup mezbûretânın zâtlarını ma‘rifet-i şer‘iyye ile ârifân olan el-Hâc İbrahim b. Sefer ve Ali b. Mehmed nâm kimesneler şehâdetleri ile şer‘an sâbit oldukdan sonra vekâleten meclis-i şer‘-i hatîrde zikri sebk eden İlyaslı nâm karye sükkânından işbu bâ‘isü’l-kitâb Musa b. Abdullah nâm kimesne mahzarında ikrâr ve takrîr-i kelâm edip müteveffâ-yı merkūm Nasuh’un merkūm Musa zimmetinde cihet-i deyn-i şer‘îden üç yüz esedî guruş hakkı olup kable’l-istîfâ vefât etmekle meblağ-ı merkūm bi’l-irsi’ş-şer‘î müvekkiletân-ı merkūmetân ile bana intikāl etmişidi deyû bundan akdem mezbûr Musa’dan meblağ-ı mezbûru da‘vâ eylediğimde, ol dahi inkâr etmeğin beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip meblağ-ı mezkûr da‘vâsından merkūm Musa ile beynimizde elli beş esedî guruş üzerine inşâ-i akd-i sulh ettiklerinde ben dahi asâleten ve vekâleten sulh-i mezbûru kabûl ve bedel-i sulh olan meblağ-ı mezkûr elli beş esedî guruşu mezkûr Musa yedinden tamâmen ahz u kabz edip husûs-ı mezkûra müte‘allika da‘vâdan merkūm Musa’yı asâleten ve vekâleten ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mahmud Bey b. Bayram, Ali b. Hüseyin, Veli b. Ahmed, Ebûbekir b. Yahya.