Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 189 Hüküm no: 185 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Nikola’nın ev ve arı kovanlarını Yorgo v. Liko’ya satması Havâss-ı Aliyye kazâsı tevâbi‘inden Kemerli Belgrad nâm karye sâkinlerinden Kosta v. Nikola nâm zimmî meclis-i şer‘de işbu râfi‘ü’s-sifr Yorgo v. Liko nâm zimmî muvâcehesinde ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûrede vâki‘ bir tarafdan Foti mülkü ve bir tarafdan Dimitri mülkü ve tarafeyni Şermet mülkü ve Yorgi mülkü ve tarîk-i âm ile mahdûd iki bâb tahtânî oda ve bahçe-i zât-ı eşcâr-ı müsmire ve gayrı müsmireyi ve fırını müştemil mülk menzilimi bi cümleti’t-tevâbi‘ ve’l-levâhık ve menzil-i mezbûrda mevcûd on beş aded arı kovanlarımı dahi içinde mevcûd olan aseli ve arısıyla merkūm Yorgo’ya beş bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi safkatin vâhidetin bâtten bey‘ ve teslîm eylediğimde ol dahi vech-i muharrer üzre iştirâ ve tesellüm ve kabz ve ve kabûl eylediğinden sonra semeni olan mezbûrü’n-na‘t beş bin akçeyi bi’t-tamâm mesfûr Yorgo yedinden alıp kabz edip menzil-i mahdûd [ve] mezkûrûn aded kovan merkūm Yorgo’nun mülk-i müşterâsıdır ve hakk-ı sarîhidir, keyfe mâ yeşâ’ mutasarrıf olsun dedikde mâ hüve’l-vâki‘ kayd şüd. Fi’l-yevmi’t-tâsi‘ ve’l-ışrîn li sene isneteyn ve seb‘în ve elf. Şuhûdü’l-hâl: Hamza Efendi nâib-i recül, Hüseyin b. Hasan, Dilâver Muhzır, Mehmed muhzır ve gayruhüm mine’l-hâzırîn.