Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 189 Hüküm no: 186 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Debbağ esnafından üstat Mehmed b. Muharrem’in eşyalarını Yusuf b. Abdülvehhâb’a bağışlaması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesinde Mirza odalarında sâkin olup meclis-i şer‘a huzûru müte‘azzir olan Üstâd Mehmed b. Muharrem ed-Debbâğ kıbelinden hibe-i âti’z-zikr[i] ikrâra vekîl olup Mustafa Çelebi b. Hüdâverdi ve Üstâd Mustafa Abdullah ed-Debbâğ şehâdetleriyle şer‘an vekâleti sâbite olan Şaban Çelebi b. Ömer nâm kimesne meclis-i şer‘de müvekkili mezbûr Üstâd Mehmed’in mu‘takı sâhibü’l-kitâb Yusuf b. Abdülvehhâb nâm şâbb-ı emred mahzarında bi’l-vekâle ikrâr ve takrîr-i kelâm edip müvekkilim mezbûr Üstâd Mehmed hibe-i âti’z-zikrin sudûruna değin silk-i mülk-i sahîhinde münselik emlâkinden bir yeşil çuka kaplı müsta‘mel kürkü ve bir müsta‘mel lâciverd çuka dolama ve bir tülbent ve iki güğüm ve iki leğen ve bir tencere ve bir kırmızı dolama ve dört aded kebe ve bir seccâdesini ve beynlerinde cins ve vasfı ilm-i şer‘î ile ma‘lûm sâir hırdavat-hânesini mu‘takı merkūm Yusuf’a hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede vech-i muharrer üzre ittihâb [ve] temellük ve tesellüm ve kabz ve kabûl eyledi ba‘de’l-yevm eşyâ-i mezkûre ve sâir beynlerinde hırdavat-hâne mu‘takım merkūm Yusuf’un mülk-i mevhûbudur, keyfe mâ yeşâ’ mutasarrıf olsun dedikde mâ hüve’l-vâki‘ kayd şüd. Fi’l-yevmi’l-hâmis ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mustafa Beşe b. Abdullah, Üstâd Yusuf b. Zeynelâbidin, Bayram Beşe el-Kettânî, Mehmed Çavuş b. Mehmed Malkoç.