Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 190 Hüküm no: 187 Orijinal metin no: [39b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Abdullah’ın kayığında yakalanan derilerle İsak v. Saltık’ın ilgisi olmadığının tespiti Kesriye cemâ‘atinden İsak v. Saltık nâm yahudi meclis-i şer‘de medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Balçık iskelesi kayıkçılarından Yusuf b. Abdullah nâm kimesne mahzarında takrîr-i kelâm ve ta‘bîr ani’l-merâm edip târih-i kitâbdan on beş gün mukaddem mezbûr Yusuf kayığında koyun derileri tahmîl edip giderken mahrûse-i Galata a‘mâlinden kasaba-i Kasımpaşa debbâğları mezbûru ahz edip İstanbul’da koyun derisi alıp Eyüb’e ve âhar mahalle getirmek azîm yasakdır, elbette seni küreğe koydururuz eğer halâsın murâd edersen mahkemede bu deriler Saltıkoğlu’nundur deyû ikrâr eyle deyû merkūm Yusuf [u] tahvîf etmeleri ile merkūm dahi benim âgâh [ve] haberim yoğiken havfından minvâl-i muharrer üzre ikrâr etmeğin mezbûrûn debbâğlar beni tağrîm ve tecrîm? için mezbûr Yusuf’un ikrârını hüccet ettirmişlerdir el-hâletü hâzihî vâki‘ hâl mezbûr Yusuf’dan suâl olunup takrîr tahrîr olunmak matlûbumdur deyicek gıbbe’s-suâl mezbûr Yusuf cevâbında fi’l-hakīka hâl bâlâda tahrîr ben dahi ücret ile Eyüb debbâğhânesine getirir iken beni ahz edip minvâl-i muharrer üzre ikrâr ettirdiler lâkin mezbûr Saltıkoğlu’nun kat‘an alâka ve medhali ve haber ve âgâhı yokdur deyicek vâki‘ü’l-hâl hıfzan li’l-makāl merkūm yahudi talebiyle ketb olundu. Fî 28 min şehri Ramazâni’l-mübârek sene 1072. Şuhûdü’l-hâl: Mehmed Dede b. Mahmud, Yusuf Çelebi b. Zeynelâbidin, Sâlih Mehmed Efendi b. Mehmed, Hüseyin b. Ali ve gayruhüm mine’l-hâzırîn.