Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 190 Hüküm no: 188 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Muharrem’in câriyesini vasiyet (tedbir) yoluyla âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesi sâkinlerinden olup tahakkuk-ı özr-i şer‘î ile meclis-i şer‘a huzûru müte‘azzir olan Üstâd Mehmed b. Muharrem ed-Debbâğ kıbelinden tedbîr-i câ’i’z-zikri ikrâra vekîl olup Mustafa Çelebi b. Hüdâverdi [ve] üstâd Mustafa b. Abdullah şehâdetleriyle şer‘an vekâleti sâbite olan Şaban Çelebi b. Ömer nâm vekîl meclis-i şer‘de bi’l-vekâle ikrâr-ı tâmm ve takrîr-i kelâm edip müvekkilim mezbûr Üstâd Mehmed kendisine rıkkını mu‘terife uzun boylu açık kaşlı gök elâ gözlü seyrek dişli çiçek bozmuş Kahraman bt. Abdullah nâm mülahhame câriye-i memlûkesini tedbîr-i mukayyed ile müdebbere edip küllü nefsin zâ’ikatü’l-mevt muktezâsınca bi emrillâhi’l-meliki’l-Müte‘âl işbu dârdan ben sarây-ı ukbâya intikāl ve irtihâl etmezden kırk gün mukaddem câriye-i memlûkem mevsûfe-i mezkûre cemî‘ mülkümden âzâd olsun dedi dedikde müvekkil-i mezbûr Üstâd Mehmed fevtinden mukaddem olan kırk gününde sahîh bulunursa mevsûfe-i mezkûre kavl-i muhtâr ve müftâ-bih üzre cemî‘ malından âzâd olunmak üzre işbu vesîka-i enîka bi’l-ibtigā sebt [ve] imlâ olundu. Fî 24 min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Fahrü’l-cüyûş Mehmed Çavuş b. Malkoç, Mustafa Beşe b. Abdullah, yoğurtçu Bayram, Mustafa Çelebi b. Mehmed, Üstâd Mehmed b. Mustafa ve gayruhüm mine’l-hâzırîn.