Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 191 Hüküm no: 189 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Muharrem’in kölesi Hasan b. Abdullah’ı vasiyyet (tedbir) yoluyla âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesinde vâki‘ Mirza odalarında sâkin olup meclis-i şer‘a huzûru müte‘azzir olan Üstâd Mehmed b. Muharrem tarafından müdebber-i âti’z-zikri ikrâra vekîl olup Mustafa Çelebi b. Hüdâverdi ve Üstâd Mustafa b. Abdullah şehâdetleriyle şer‘an vekâleti sâbite olan Şaban Çelebi b. Ömer nâm vekîl meclis-i şer‘-i şerîf-i lâzımü’t-teşrîfde, bi’l-vekâle ikrâr ve takrîr-i kelâm edip mezbûr Üstâd Mehmed kendisine rıkkını mu‘terif olan alçak boylu, sarışın gök gözlü, açık kaşlı, seyrek dişli çenesinde alâmet nişânı olan Rûsiyyü’l-asl sâhibü’l-kitâb Hasan b. Abdullah nâm şâb emred gulâm-ı memlûkümü tedbîr-i mukayyed ile müdebber edip küllü nefsin zâ’ikatü’l-mevt fehvâsı üzre bi emrillâhi te‘âlâ kazâ-i nahb etmezden kırk gün mukaddem abd-i memlûküm mevsûf-ı mezkûr Hasan cemî‘ malımdam âzâd olup harâir-i asliyyîn gibi hür olsun dedi deyicek müvekkil-i mezbûr Üstâd Mehmed vefâtından evvel olan kırk gününde sahîh bulunduğu takdîrce ale’l-mezhebi’l-muhtâr ve’l-müftâ-bih gulâm-ı merkūm Hasan cümle malından âzâd olmak üzre hâzihi’l-vesîka bi’l-ibtigā sebt ve imlâ olundu. Fî 2 min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Fahrü’l-akrân Mehmed Çavuş Malkoç, Mustafa Beşe b. Abdullah, Üstâd Yusuf b. Zeynelâbidin, Bayram Beşe el-Kettânî ve gayruhüm mine’l-hâzırîn.