Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 192 Hüküm no: 190 Orijinal metin no: [40a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Muharrem’in vasiyeti Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesi sâkinlerinden Üstâd Mehmed b. Muharrem ed-Debbâğ kıbelinden husûs-ı âti’z-zikri ikrâra vekîl olup Mustafa Çelebi b. Hüdâverdi ve Üstâd Mustafa b. Abdullah şehâdetleriyle şer‘an vekâleti sâbite olan Şaban Çelebi b. Ömer nâm kimesne meclis-i şer‘de bi’l-vekâle ikrâr ve takrîr-i kelâm edip işbu dâr-ı dünyâ dâr-ı fenâ ve gurûr olup na‘îmi zıll-ı zâ’il ve mukīmi dayf-ı râhil olduğu mukarrer ve muhakkak ve bu nakş-ı bukalemûn-hayâl-i hâba mülhak emr-i muztar olmağın müvekkilim mezbûr Üstâd Mehmed bu âlem-i fenâ ve şuhûddan sarây-ı bekā ve hulûda teveccüh ve azîmet etmezden mukaddem ba‘zı sadakāt-ı mebrûre inşâsına niyet ve azîmet ve muzâfen ilâ mâ ba‘de’l-mevt şöyle vasiyyet eder ki küllü nefsin zâ’ikatü’l-mevt ve küllü hayyin yülâkīhi’l-mevt fehvâsı üzre ben işbu dâr-ı dünyâdan sarây-ı ukbâya teveccüh ve azîmet eylediğimde mukaddemâ müdebber edip mevtim ile âzâd olan Hasan b. Abdullah nâm mu‘takıma bir yastık ve bir minder ve bir tencere ve bir sahan ve bir yorgan ve bir kebe ve bir tepsi ve bir kilim ve yine ber minvâl-i muharrer mu‘takam olan Kahraman bt. Abdullah’a dahi bir yastık ve bir minder ve tencere ve bir sahan ve bir yorgan ve bir kebe ve bir tepsi vasiyyetim olup işbu eşyâ emlâkimden ifrâz olunup mu‘takım merkūm Hasan ile mu‘takam mezbûre Kahraman’a def‘ ve teslîm oluna ve sâir muhallefâtımdan bin altı yüz kırk akçe ifrâz olunup beş yüz akçesi iskāt-ı salâtıma ve bin akçesi techîz ve tekfînime ve eyyâm-ı mu‘tâdede tabh-ı ta‘âma ve yüz akçesi gassâla ve kırk akçesi beytülmâle harc ve sarf olunup bâkī kalırsa vücûh-ı hayrâta sarf oluna ve vasiyyetimi tenfîz için Câmi‘-i Kebîr imâmı fahrü’l-eimme hâzır bi’l-meclis Mehmed Efendi b. İbrahim vasiyy-i muhtâr nasb ve ta‘yîn eyledim dedi dedikde ol dahi vesâyet-i mezbûre[yi] kabûl ve hıdemât-ı lâzımesini edâya müte‘ahhid olmağın mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mustafa Beşe b. Abdullah ed-Debbâğ, Üstâd Yusuf b. Zeynelâbidin, Bayram Beşe el-Kettânî, Mustafa Beşe b. Mehmed, Üstâd Mehmed b. Mustafa, Mehmed b. Mehmed, Hüseyin b. Hızır ve gayruhüm mine’l-hâzırîn.