Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 193 Hüküm no: 191 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bozacılardan Mihal v. Velko’nun Damyan’da olduğunu iddia ettiği alacağını ispatlayamadığı Bozacı tâifesinden Mihal v. Velko nâm zimmî meclis-i şer‘de Damyan v. Petko nâm zimmî muvâcehesinde üzerine takrîr-i da‘vâ edip gāib ani’l-meclis Hristo nâm bostânî[de] cihet-i karz-ı şer‘îden iki bin üç yüz akçe hakkım olup meblağ-ı mezbûru bana edâ ve teslîme bundan akdem mesfûr Damyan emr ve kabûlü hâvî kefâlet-i sahîha-i şer‘iyye ile kefîl olmağla hâlâ meblağ-ı mezbûru kefîl-i mezbûrdan taleb eylediğimde teslîmden imtinâ‘ eder suâl olunup alıverilmesin murâd ederim deyicek gıbbe’s-suâl mersû[m] Damyan kefâletini inkâr ile cevâb vermeğin müdde‘î-i mezbûrdan müdde‘âsını mübeyyine beyyine taleb olundukda, ityân-ı beyyineden izhâr-ı acz ile istihlâf etmeğin zikr olunan iki bin üç yüz akçe deynini müdde‘î-i mezbûra edâya kefîl olmadığına merkūm Damyan’a yemîn teklîf olundukda, ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin merkūm Mihal mesfûr Damyan’a bî-vech ta‘arruzdan men‘ birle mâ hüve’l-vâki‘ kayd şüd. Fî selh-i Ramazâni’l-mübârek sene 1072. Şuhûdü’l-hâl: Ali Beşe Çukadâr, Mehmed Çelebi b. Musli, Mustafa Çelebi b. Hüdâverdi ve gayruhüm mine’l-hâzırîn.