Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 296 Hüküm no: 332 Orijinal metin no: [43a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın değirmen tamir bahasından İsmail Bey b. Muharrem’den alacaklı olduğu Mahmiye-i İstanbul’da Hatîb Muhyiddin mahallesinde sâkin Ahmed b. Abdullah nâm kimesne meclis-i şer‘-i hatîr-i lâzımü’t-tevkīrde İsmail Bey b. Muharrem nâm kimesne mahzarında üzerine da‘vâ ve takrîr-i kelâm edip merkūm İsmail Bey’in vâlidesi Râziye Hâtun’un mahrûse-i Galata’ya tâbi‘ Beşiktaş’da Hankapısı kurbunda vâki‘ bir bâb mülk değirmenini merkūm İsmail’in vâlidesi mezbûre Râziye’nin vekîli olmağla zikr olunan değirmen harâb olmağın mezbûr İsmail Bey mârrü’z-zikr değirmeni kendi malın ile müceddeden binâ eyle, ba‘dehû masrûfun olan meblağı sana edâ edeyim deyû bana emr etmekle ben dahi emrine binâen müceddeden binâ edip yirmi iki bin dokuz yüz akçe harc ve sarf edip meblağ-ı mezbûrdan mukaddemâ üç bin altı yüz akçesini zikr olunan değirmen icâresinden istîfâ edip bâkī on dokuz bin üç yüz akçeyi merkūm İsmail Bey’den hâlâ taleb ederim suâl olunsun dedikde gıbbe’s-suâl merkūm İsmail Bey cevâbında fi’l-vâki‘ müdde‘î-i merkūm Ahmed zikr olunan değirmene vech-i muharrer üzre emrim ile yirmi iki bin dokuz yüz akçe harc ve sarf edip mukaddemâ üç bin altı yüz akçesini değirmen ücretinden istîfâ edip bâkī on dokuz bin üç yüz akçe hakkı vardır deyû bi tav‘ihî ikrâr ve i‘tirâf etmeğin mûcebince meblağ-ı mezbûru müdde‘î-i merkūma edâ ve teslîme merkūm İsmail Bey’e tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Çelebi b. Abdülmennân Kethüdâ-yı muhzırân, Abdi Çelebi b. Hüseyin, Baba Resul b. Rıdvan, Mehmed b. Ramazan ve gayruhüm mine’l-huzzâr.