Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 198 Hüküm no: 197 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Ali Efendi’nin terekesi Defter oldur ki medîne-i hazret-i Ebâ Eyyûb el-Ensârî -dâme fî rıdvâni’l-Bârî-’de Defterdâr Mahmud Efendi mahallesinde sâkin fahrü’l-emâsil ve’l-eşbâh Karakaş Ali Ağa menzilinde sâkin iken bundan akdem vefât eden Müderris Ali Efendi’nin min ciheti’l-usûbeti’n-nesebiyye bi’l-inhisâr vârisi olan Mehmed Çelebi b. Sunullah nâm kimesnenin vekîli Şaban b. Receb nâm kimesne müteveffâ-yı mezbûrun müşârün-ileyh Ali Ağa yedinden meclis-i şer‘de vekâleten kabz eylediği defterdir ki zeyl-i vesîkada muharrerü’l-esâmî olan müslimîn huzûrunda tahrîr olundu. Fî selh-i şehri Ramazâni’l-mübârek sene 1072. İsmi nâ-ma‘lûm kitâb cild aded 42 Bir sepet evrâk-ı perîşân Kimonî köhne çuka ferâce aded 1 Darçınî çuka kaplı köhne tilki kürkü aded 1 Köhne pîştahta aded 1 Sincab kaplı köhne hâre mintan kürk aded 1 Köhne mor sof aded 1 Nısf destâr aded 1 Tülbent börkü aded 1 Zikr olunan muhallefâtı vekîl-i mezbûr müvekkili için meclis-i şer‘de bi’l-vekâle ahz ve kabz edip bundan mâ‘adâ kalîl ve kebîr ve celîl ve hakīr nukūd ve siyâb ve ism-i mâl ıtlâk olunur bir nesnesini [almadıklarına] müşârün-ileyh Ali Ağa’ya ve hizmetkârları Mehmed b. Abdullah ve Süleyman b. İsâ ve Şâhin b. Abdullah ve Sefer b. Abdullah nâm kimesnelere yemîn teklîf etmeğin mezkûrûn dahi yemîn billâhi te‘âlâ eylediklerinde vekîl-i mezbûr bî-vech ta‘arruzdan men‘ ve mâ cerâ bi’l-ibtigā tahrîr olundu. Fi’t-târihi’l-mezbûr. Şuhûdü’l-hâl: Muharrir-i hurûf Sâlih Mehmed Efendi b. Mehmed, Hüseyin Bey el-Cündî, Dilâver b. Abdullah el-Muhzır, Hüseyin b. Hasan ve gayruhüm mine’l-hâzırîn.