Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 202 Hüküm no: 199 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Çelebi b. Muharrem’deki tarla ve çayırların Kurd Ağazâde Mehmed Çelebi’ye teslim edilmesi Mahmiye-i İstanbul’da Koca Mustafa Paşa semtinde sâkin Kurd Ağazâde Mehmed Çelebi nâm kimesne meclis-i şer‘de mahmiye-i mezbûrede Davudpaşa mahallesinde sâkin iken bundan akdem vefât eden eniştesi Derviş Ağa merhûmun sulbî sagīr oğlu Mustafa Çelebi nâm yetîmin tesviye-i umûru için kıbel-i şer‘den mansûb vasî olan Musa Çelebi b. Muharrem nâm kimesne mahzarında üzerine tahrîr-i da‘vâ edip eniştem müteveffâ-yı mezbûrdan hâl-i hayâtında yüz kıt‘a riyâlî kebîr guruş istikrâz ve kabz edip ol dahi vech-i muharrer üzre ikrâz ve teslîm edip ol mukābelede Havâss-ı Aliyye kazâsı muzâfâtından Büyük Çekmece nâhiyesine tâbi‘ İskeçe nâm karye sınırı dâhilinde vâki‘ merhûm ve mağfûrun-leh Sultan Bayezid Hân-ı Velî evkāfı arâzisinden olup babam müteveffâ-yı mezbûrdan bana intikāl-i âdî ile intikāl eden inde’l-ahâliyi’d-diyâr ma‘lûmetü’l-hudûd ve’l-kıta‘ ve’l-mikdâr tarlalar ve çayırlarımı eniştem müteveffâ-yı mezbûr Derviş Ağa’ya rehin nâmına verip ba‘dehû fevt oldukda, vasiyy-i mezbûr zikr olunan tarlalar ve çayırlar sagīr-i mezbûra babası müteveffâ-yı mezbûrdan intikāl eylemişdir deyû zabt edip ben dahi meblağ-ı mezbûru edâya iktidârım olmamağla sükût etmişidim el-hâletü hâzihî sâlifü’z-zikr yüz guruşu edâ ve ol tarlalar ve çayırları zabt murâd eylediğimde vasiyy-i mezbûr zabtıma mâni‘ olur, suâl olunup yedimde olan fetvâ-yı şerîfe mûcebince ihkāk-ı hak olunmak matlûbumdur deyû yedinde olan fetvâ-yı şerîfeyi ibrâz edip feth ve kırâat olundukda, Zeyd ( ) olur mu deyû hâlâ şeyhülislâm-ı müfti’l-enâm -sellemehü’s-selâm- hazretlerine istiftâ olundukda, cevâb-ı bâ savâblarında olur deyû buyurulmağın gıbbe’s-suâl vech-i mezbûr cevâbında fi’l-hakīka müdde‘î-i mezbûr vasîsi olduğu sagīr-i mezbûr babası müteveffâ-yı mezbûr Derviş Ağa’ya evkāf-ı mezbûreden olup hâl-i hayâtında babası müteveffâ-yı mezbûrdan kendisine intikāl eden ma‘lûmetü’l-hudûd ve’l-kıta‘ ve’l-mikdâr çayırlar ve tarlaları yüz kıt‘a riyâlî kebîr guruş bedel mukābelesinde evkāf-ı mezbûr mütevellîsi ma‘rifetiyle tefvîz bi’l-ferâğ edip ol dahi vech-i muharrer üzre tefevvüz ve kabûl edip ba‘de vefâtihî ol tarlalar ve çayırlar oğlu sagīr-i mezbûra intikāl etmişdir binâen aleyh zabt eylemişdir deyicek isre’l-istintâk, mezbûr Mehmed Çelebi sâlifü’z-zikr tarlalar ve çayırları eniştesi müteveffâ-yı mezbûr Derviş Ağa’ya ber minvâl-i meşrûh ol mütevellî-i vakf-ı mezbûr ile ferâğ ve tefvîzi inkâr ile cevâb vermeğin mûceb-i fetvâ-yı şerîf vasiyy-i mezbûrdan müdde‘î-i mezbûrun tefvîz ve ferâğını mübeyyine beyyine taleb olundukda, isbât-ı beyyineden izhâr-ı acz ile istihlâf etmeğin mezbûr zikr olunan tarlalar ve çayırları eniştesi müteveffâ-yı mezbûr Derviş Ağa’ya vech-i mübeyyen üzre yüz kıt‘a riyâlî guruşa tefvîz ve ferâğ eylediğine mezbûr Mehmed Çelebi’ye yemîn teklîf olundukda, ol dahi alâ vefki’l-mes’ûl half billâhi’l-aliyyi’l-A‘lâ etmeğin ber mûceb-i fetvâ-yı şerîf zikr olunan yüz kıt‘a riyâlî guruş sagīr-i mezbûr için kabz ve ol tarlalar ve çayırları müdde‘î-i mezbûra teslîme vasiyy-i merkūma tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Bâli Çavuş el-Mübâşir, Ahmed Çavuş b. Mehmed, Dilâver b. ( ), İbrahim Çelebi b. Hasan ve gayruhüm mine’l-hâzırîn.