Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 203 Hüküm no: 200 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın, Altun v. Melkon’dan aldığı parayı iade etmesi Ekmekçi tâifesinden Altun v. Melkon nâm Ermeni meclis-i şer‘de Mehmed Beşe b. Abdullah nâm râcil mahzarında üzerine takrîr-i da‘vâ edip târih-i kitâbdan bir ay mukaddem mezbûr Mehmed Beşe benden esedîye tebdîl etmek için on iki bin yedi yüz nakd-i râyic fi’l-vakt akçe ahz ve kabz edip hâlâ ne esedî ve ne akçemi verir, suâl olunup alıverilmek matlûbumdur deyicek gıbbe’s-suâl mezbûr Mehmed Beşe cevâbında fi’l-hakīka târih-i mezbûrda müdde‘î-i mezbûr Altun’dan minvâl-i muharrer üzre on iki bin dört yüz akçe alıp kabz eylemişdim deyû bi tav‘ihî ikrâr ve i‘tirâf etmeğin müdde‘î-i mezbûrdan ziyâdeyi mübeyyine beyyine taleb olundukda ityân-ı beyyineden izhâr-ı acz edip istihlâf dahi etmeğin alâ mûcebi ikrârihî sâlifü’z-zikr on iki bin dört yüz akçeyi müdde‘î-i mezbûra edâ ve teslîm ile mezbûr Mehmed Beşe ilzâm olunup mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mehmed b. Mahmud, Hüseyin b. Hasan, Receb Bey b. Maden, Sâlih Efendi b. Mehmed, Hamza Efendi nâib-i recül, Eyüb Çelebi el-Mukayyid, Ali Beşe Çukadâr, Mehmed Beşe el-Mübâşir ve gayruhüm mine’l-hâzırîn.