Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 204 Hüküm no: 201 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye Hatun bt. Abdullah’ın evini Handan Bey b. Abdullah’a satması Medîne-i hazret-i Ebâ Eyyûb el-Ensârî -radiye anhu Rabbühü’l-Bârî-’de vâki‘ Câmi‘-i Kebîr mahallesi sâkinelerinden fahrü’l-muhadderât Safiye Hâtun bt. Abdullah meclis-i şerî‘at-ı şerîfede işbu kitâb-ı sıhhat-nisâbın sâhibi umdetü’l-emâsil ve’l-eşbâh Handan Bey b. Abdullah mahzarında bi tav‘ihî ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden sonra mahalle-i mezbûrda vâki‘ bir tarafdan Ali Efendi nâm müderris tasarrufunda olan vakıf menzil ve bir tarafdan Müderris bostanı ve ba‘zan Ahmed Ağa tasarrufunda olan vakıf menzil ve bir tarafdan Mehmed tasarrufunda olan vakıf menzil ve bir tarafdan tarîk-i âm ile mahdûd, iki bâb fevkānî ve iki tahtânî odaları ve cihânnümâyı ve tahtânî matbahı ve ahırı ve üç bi’r-i mâ ve iki kıt‘a bahçeyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mûmâ-ileyh Handan Bey’e iki yük fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm edip ol dahi ber minvâl-i muharrer iştirâ ve tesellüm ve kabz ve kabûl edip semeni olan mezbûrü’n-na‘t iki yük akçeyi bi’t-tamâm ve’l-kemâl müşterî-i mûmâ-ileyh Handan Bey yedinden alıp kabz edip menzil-i mahdûd-ı mezkûrda vechen mine’l-vücûh ve sebeben mine’l-esbâb alâka ve medhalim kalmadı ba‘de’l-yevm menzil-i mezkûr müşterî-i mezbûrun mülk-i müşterâsı ve hakk-ı sarîhidir, keyfe mâ yeşâ’ ve hasbe mâ yahtâr mutasarrıf olsun dedikde mukırra-i mezbûreyi kitâb-ı meşrûhasında el-mukarru lehü’l-mezbûr vicâhen tasdîk ve şifâhen tahkīk etmeğin mâ hüve’l-vâki‘ kayd şüd. Fi’l-yevmi’r-râbi‘ min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed el-Mütevellî, Mustafa Çelebi b. Hüdâverdi, Hüseyin Çelebi b. Abdullah, Ali Çelebi b. Hızır el-Kâtib, Mustafa Çelebi b. Pervâne, Ahmed Çelebi b. Emrullah, Mehmed Çelebi b. Ahmed, Musli Çelebi b. Abdullah, Mehmed Çelebi b. Musli, Hüseyin Muhzır, Mustafa Çelebi el-Müezzin ve gayruhüm mine’l-hâzırîn.