Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 204 Hüküm no: 202 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye Hatun bt. Abdullah’ın Ahmed Çelebi b. İslâm’a olan borcunu ödemesi Dergâh-ı âlî -dâme mahfûfen bi’l-me‘âlî- yeniçerilerinden Bağdâdî Ahmed Çelebi b. İslâm nâm kimesne meclis-i şer‘-i şerîfde medîne-i hazret-i Ebâ Eyyûb el-Ensârî -radıyallâhu anhu Rabbühü’l-Bârî-’de Câmi‘-i Kebîr mahallesi sâkineleri[nden] Safiye Hâtun bt. Abdullah mahzarında üzerine da‘vâ ve takrîr-i kelâm edip cihet-i deyn-i şer‘îden mezbûr Safiye Hâtun zimmetinde yüz yirmi fıddî nakd-i râyic fi’l-vakt akçe hakkım olup bundan akdem merkūme Safiye Hâtun mahalle-i mezbûrede vâki‘ lede’l-ahâlî ve’l-cîrân ma‘lûmetü’l-hudûd mülk menzilini semen-i misli ile bey‘ ve semeninden zikr olunan yüz yirmi bin akçeyi bana edâ ve teslîm ve bâkī kalırsa kendisine îsâle hâzır bi’l-meclis Mustafa Çelebi b. Hüdâverdi nâm kimesneyi tarafından vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve hıdemât-ı lâzımesini edâya müte‘ahhid etmişidi el-hâletü hâzihî mezbûre Safiye Hâtun vekîli merkūm Mustafa Çelebi ma‘rifetiyle menzil-i mezbûru âhara bey‘ ve teslîm edip zikr olunan yüz yirmi bin akçe hakkımı bana edâ ve teslîme ta‘allül eder suâl olunup alıverilmek matlûbumdur deyicek gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda, udûl-i ricâlden Mahmud Çelebi b. İbrahim ve Musli Çelebi b. Receb nâm kimesneler li ecli’ş-şehâde makām-ı kazâya hâzırân olup isre’l-istişhâd fi’l-vâki‘ mezbûre Safiye sene seb‘în ve elf Cemâziyelevveli’nin üçüncü günü mahalle-i mezbûrede vâki‘ kendi menzilinde bizim huzûrumuzda müdde‘î-i mezbûr Ahmed Çelebi’ye yüz yirmi bin fıddî akçe zimmetimde lâzımü’l-edâ deynim vardır deyû ikrâr ve bizi işhâd eyledi, biz mezbûrenin vech-i muharrer üzre ikrârına şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle zikr olunan yüz yirmi bin akçeyi müdde‘î-i mezbûra edâ ve teslîme merkūme Safiye Hâtun’a tenbîh birle mâ hüve’l-vâki‘ kayd şüd. Fi’l-yevmi evâhiri [min] şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Mustafa Çelebi b. Pervâne, Hamza Efendi nâib-i ricâl, Mehmed Çelebi b. Musli ve gayruhüm mine’l-hâzırîn.