Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 205 Hüküm no: 203 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye Hatun bt. Abdullah’ın istiğlâl yoluyla sattığı evi borcunu ödediği için geri alması Dergâh-ı âlî yeniçerilerinden Bağdâdî Ahmed Ağa b. İslâm nâm râcil meclis-i şer‘-i şerîf-i lâzımü’t-tevkīrde işbu kitâb-ı sıhhat-nisâbın sâhibesi fahrü’l-muhadderât Safiye Hâtun bt. Abdullah mahzarında ikrâr ve takrîr-i kelâm edip bundan akdem mezkûre Safiye Hâtun silk-i mülk-i sahîhinde münselik olup mahallât-ı Ebâ Eyyûb el-Ensârî’den Câmi‘-i Kebîr mahallesinde vâki‘ bir tarafdan Ali Efendi tasarrufunda olan vakıf menzil ve bir tarafdan Müderris bostanı ve ba‘zan Ahmed Ağa mutasarrıf olduğu vakıf menzil ve bir tarafdan Mehmed tasarrufunda olan vakıf menzil ve bir tarafdan tarîk-i âm ile mahdûd mecmû‘ mülk menzilini bana seksen bin fıddî nakd-i râyic fi’l-vakt akçeye alâ tarîki’l-istiğlâl bey‘ ve ba‘de’t-tahliyye bana teslîm, ben dahi kabz edip sene tamâmına değin icâre-i ma‘lûme ile yine mûmâ-ileyhâ Safiye Hâtun’a îcâr ve teslîm eylediğimde ol dahi vech-i muharrer üzre istîcâr ve tesellüm ve kabz ve kabûl eylemişdi el-hâletü hâzihî zikr olunan seksen bin akçe ve menzil-i mezbûrun icâre-i ma‘lûmesinden müctemi‘ kırk bin akçe ki cem‘an yüz yirmi bin nakd-i râyic fi’l-vakt akçeyi mûmâ-ileyhâ Safiye Hâtun yedinden tamamen alıp kabz edip fekk-i istiğlâl eyledim min ba‘d menzil-i mahdûd-ı mezkûrda vechen mine’l-vücûh alâkam kalmadı mezbûre Safiye Hâtun keyfe mâ yeşâ’ mutasarrıfe olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fî evâili Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Mustafa Çelebi b. Rıdvan, Hamza Efendi [b.] Mehmed, Mustafa Çelebi b. Hüdâverdi, Sâlih Mehmed Efendi b. Mehmed ve gayruhüm mine’l-hâzırîn.