Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 206 Hüküm no: 204 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Lanbo’nun evini Kanilo v. Kiryaki’ye satması Vilâyet-i Rumeli’nde cezîre-i Mora’da Mizistre kazâsına tâbi‘ Anavari [Navarin] nâm karye sâkinlerinden Dimitri v. Lanbo nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-vesîka Kanilo v. Kiryaki nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden karye-i mezbûrede vâki‘ bir tarafdan Niko Arzumani mülkü ve bir tarafdan Tenoso Papadopulo mülkü ve bir tarafdan Yani Kapoşaraki mülkü ve tarîk-i âm ile mahdûd ve bir tarafdan Kiryaki Simatpilo mülkü ile mahdûd bir bâb fevkānî oda ve altında ahır ve havluyu ve kurbunda Menuso yanında bir mikdâr arsa-i hâliyeyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūm Kanilo’ya tâmmü’l-vezn sahîhü’l-ayâr altmış kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i kat‘î ile bâtten bey‘ ve teslîm edip ol dahi vech-i muharrer üzre iştirâ ve kabûl edip semeni olan mezbûrü’n-na‘t altmış kıt‘a riyâlî guruşu tamamen müşterî-i merkūm Kanilo yedinden bi’t-tamâm alıp kabz edip menzil-i mahdûd-ı mezkûrda vechen mine’l-vücûh alâkam yokdur, mesfûr Kanilo’nun mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’r-râbi‘ bin Şevvâli’l-mükerrem li sene isneteyn ve seb‘în ve elf. Şuhûdü’l-hâl: Receb Kethüdâ b. Maden, Mehmed b. Mahmud, Hamza Efendi nâib-i recül, Sâlih Efendi b. Mehmed ve gayruhüm mine’l-hâzırîn.