Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 207 Hüküm no: 205 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed’in vakıf evi Sâliha bt. Süleyman’a devretmesi [Derkenar:] İcâre-i müeccele tasarruf eylediği menzili mütevellî ma‘rifeti ile şu kadar akçe bedel ile ferâğ sûretidir. Medîne-i hazret-i Ebâ Eyyûb el-Ensârî -dâme fî rıdvâni’l-Bârî-’de Baba Haydar-ı Nakşibendî mahallesi sâkinlerinden Ali Beşe b. Mehmed nâm kimesne meclis-i şer‘-i hatîr-i lâzımü’t-tevkīrde işbu sâhibetü’l-kitâb Sâliha bt. Süleyman nâm hâtun mahzarında ikrâr ve takrîr-i kelâm edip tefvîz-i âti’z-zikrin sudûruna değin zabt ve taht-ı tasarrufumda olup gallesi mahalle-i mezbûre müezzinine meşrûta mahalle-i mezbûrede vâki‘ bir tarafdan Hekimzâde Mustafa Çelebi mülkü ve bir tarafdan müezzine meşrûta âhar menzil ve tarafeyni tarîk-i âm ile mahdûd iki bâb fevkānî ve bir bâb tahtânî oda ve cüneyne-i zât-ı eşcâr-ı müsmire ve gayrı müsmireyi ve mahzen ile su kuyusunu müştemil icâre-i mu‘accele ve beher şehr yirmi beş akçe müeccele ile mutasarrıf olduğum menzili, cemî‘ tevâbi‘ ve levâhıkı ile mezbûre Sâliha’ya izn-i mütevellî-i vakf-ı mezbûr ile on üç bin fıddî nakd-i râyic fi’l-vakt akçe bedel mukābelesinde tefvîz bi’l-ferâğ eylediğimde ol dahi vech-i muharrer üzre tefevvüz ve kabûl edip bedel-i ferâğ olan mezbûrü’n-na‘t on üç bin akçeyi tamamen merkūme Sâliha yedinden alıp kabz edip menzil-i mahdûd-ı mezkûrda alâkam kalmadı ba‘de’l-yevm mâh-be-mâh yirmi beşer akçe icâresini cânib-i vakfa edâ edip menzil-i mezbûra emsâli gibi mutasarrıfe olsun dedikde gıbbe’t-tasdîk mâ hüve’l-vâki‘ kayd şüd. Fi’l-yevmi’s-sâdis min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Eş-Şeyh Abdullah Efendi b. İsâ el-Halvetî, Halil Efendi el-Mütevellî, Halil Halîfe el-Müezzin, Ali Çelebi b. Abdullah ve gayruhüm mine’l-hâzırîn.