Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 207 Hüküm no: 206 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hatun bt. Mehmed’in kölesi İftihar bt. Abdullah’ı vasiyet (tedbir) yoluyla âzat etmesi Sûret-i tedbîr Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Çavuş Kasım mahallesi sâkinelerinden Topçuzâde kızı demekle ma‘rûfe Râbia Hâtun bt. Mehmed Efendi kıbelinden tedbîr-i âti’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olan Ramazan b. Mehmed el-Müezzin ve Ali Bey b. Mehmed şehâdetleriyle şer‘an vekâleti sâbite olan Balcı Ali Çelebi b. Sefer nâm kimesne meclis-i şer‘-i şerîf-i şâmihü’l-imâdda bi’l-vekâle ikrâr ve takrîr-i kelâm edip müvekkilem mezbûre Râbia Hâtun kendisine rıkkını mu‘terife uzun boylu açık kaşlı, kara elâ gözlü burnu kerteles uzu[n]? sûretli Rûsiyyetü’l-asl sâhibetü’l-kitâb İftihar bt. Abdullah nâm câriye-i memlûkesini hasbeten lillâhi te‘âlâ tedbîr-i mutlak ile müdebbere edip küllü nefsin zâ’ikatü’l-mevt ve küllü hayyin yülâkīhi’l-fevt fehvâsı üzre bi emrillâhi te‘âlâ ben işbu dâr-ı dünyâdan sarây-ı ukbâya intikāl ve irtihâl eylediğimde câriyem mevsûfe-i mezkûre malımdan âzâd olup sâir harâir-i asliyyât gibi hürre olsun dedi dedikde mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Sâlih Mehmed Efendi b. Mehmed, Hamza Efendi nâib-i recül, Mehmed Beşe b. Musli, Receb Kethüdâ b. Maden ve gayruhüm mine’l-hâzırîn.