Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 208 Hüküm no: 207 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Niko’nun, emlâk hisselerini kızı Rado bt. Kirkor’a hibe etmesi Vilâyet-i Rumeli’nde Premedi kazâsına tâbi‘ Mila nâm karyede sâkin Kirkor v. Niko nâm zimmî mahfil-i kazâda sulbiye kebîr kızı işbu sâhibetü’l-vesîka Rado bt. Kirkor nâm zimmî tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan zevci Petro v. Yani nâm vekîl muvâcehesinde bi tav‘ihî ikrâr ve takrîr-i kelâm edip hibe-i âti’z-zikrin sudûruna değin li ebeveyn karındaşı gāib ani’l-meclis Duka v. Niko nâm zimmî ile ale’l-iştirâki’s-seviy mülkümüz olup karye-i mezbûrede vâki‘ bir tarafdan Ali Bey mülkü ve iki tarafdan âhar karındaşım Hristo mülkü ve taraf-ı âharı Vaso mülkü ve tarîk-i âm ile mahdûd iki bâb tahtânî oda ve bir kıt‘a samanlık ve bir mikdâr havlunun nısfı benim ve nısf-ı âharı karındaşım mezbûrun mülk-i mevrûsumuz olmağın el-hâletü hâzihî menzil-i mahdûd-ı mezkûrda olan nısf hisse-i şâyi‘amı cümle tevâbi‘ ve levâhıkı ile ve yine adedi beynimizde ma‘lûm dut eşcârlarının nısflarını ve yine karye-i mezbûre sınırı dâhilinde vâki‘ her birinin hudûd[u] beynimizde ilm-i şer‘î birle ma‘lûm beş kıt‘a mülk bağlarımı dahi safka-i vâhide ile kızım müvekkile-i mezbûre Rado’ya hibe-i sahîha-i şer‘iyye ile [hibe] edip ba‘de’l-yevm menzil-i mahdûd-ı mezkûrun nısfı ile sâlifü’z-zikr dut eşcârlarının nısflarını ve beş kıt‘a bağları mahallinde ahz ü kabz [ve] zabt ve tasarrufuna kızım müvekkile-i mezbûre Rado’yu tarafımdan taslît eyledim ba‘de’l-yevm müvekkile-i mezbûrenin emlâk-i mevhûbesi olmuşdur, emsâli tasarrufu gibi keyfe mâ yeşâ’ mutasarrıfe olsun deyicek mukırr-ı mezbûrun vech-i muharrer üzre cârî ve sâdır olan ikrârını vekîl-i mezbûr Petro vicâhen ve şifâhen tasdîk etmeğin mâ hüve’l-vâki‘ kayd şüd. Fi’l-yevmi’l-hâmis min şehri Şevvâli’l-mükerrem li sene isneteyn ve seb‘în ve elf. Şuhûdü’l-hâl: Murtaza Bey b. Mustafa, Hüseyin Beşe b. Hasan, Mehmed Beşe b. Ahmed, Dilâver Bey b. Abdullah ve gayruhüm mine’l-hâzırîn.