Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 209 Hüküm no: 208 Orijinal metin no: [44b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Kalender ile Halil Beşe b. İbrahim’in geçimsizlik sebebiyle muhâlaa yoluyla boşanması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Nişancı mahallesi sâkinlerinden Ayşe bt. Kalender nâm hâtun meclis-i şerî‘at-ı şerîfede zevci işbu râfi‘ü’l-kitâb Halil Beşe b. İbrahim nâm kimesne mahzarında ikrâr ve takrîr-i kelâm edip mezbûr Halil Beşe zevci olup lâkin mu‘âşeretimiz olmamağla beynimizde şikāk-ı küllî vâki‘ olmağla mezbûrun zimmetinde mütekarrir olan altı yüz akçe mehr-i müeccel ve nafaka-i iddet ve me’ûnet-i süknâmdan fâriğa olduğumdan mâ‘adâ bir beledî döşek ve iki münakkaş yastık ve bir yemeni yorgan zevcim mezbûr Halil Beşe yedine def‘ ve teslîm ve bedel-i hul‘ olmak üzre zevcim mezbûr Halil Beşe ile muhâla‘a-i sahîha-i şer‘iyye ile muhâla‘a edip zevciyyete müte‘allik âmme-i de‘âvî ve mütâlebât ve eymân ve muhâsamâtdan zimmetini ibrâ ve iskāt eyledim deyicek mezbûr Halil Beşe meclis-i şer‘de fi’l-vâki‘ zikr olunan eşyâyı bedel-i hul‘ olmak üzre zevcem mezbûre Ayşe’nin yedinden alıp kabz edip vech-i mübeyyen üzre olan hul‘-ı merkūmu kabûl ve zevciyyete müte‘allik da‘vâdan ben dahi zimmetini ibrâ ve iskāt eyledim dedikde gıbbe’t-tesâduk mâ hüve’l-vâki‘ kayd şüd. Fi’l-yevmi’l-hâmis min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Eyüb Efendi el-Mukayyid, Mehmed Beşe b. Ahmed, Hüseyin Beşe b. Hasan, Dilâver Bey b. Abdullah ve gayruhüm mine’l-hâzırîn.