Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 209 Hüküm no: 209 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Timurhan bt. Abdullah’ın âzatlı olduğunun anlaşılması İşbu orta boylu, açık kaşlı elâ gözlü, kerteles burunlu ebyazü’l-levn Rûsiyyetü’l-asl sâhibetü’l-kitâb Timurhan bt. Abdullah meclis-i şerîfde mahmiye-i İstanbul’da Şehremîni mahallesinde sâkine iken bundan akdem vefât eden seyyidesi Gülkıyâfet bt. Abdullah nâm hâtunun zevci Mehmed Ağa b. Abdullah mahzarında üzerine da‘vâ ve takrîr-i kelâm edip seyyidem mezbûre Gülkıyâfet Hâtun târih-i kitâbdan iki ay mukaddem hâl-i hayâtında beni cemî‘ malından ifrâz ve huzûr-ı müslimînde i‘tâk ve tahrîr ve zümre-i harâir-i asliyyâta ilhâk ve idrâc etmekle sâir harâir-i asliyyât gibi hürre olmuşken hâlâ seyyidem mezbûre fevt olmağın zevci mezbûr Mehmed Ağa bana rık olmak üzre vaz‘-ı yed murâd eder el-hâletü hâzihî suâl olunup sebîlim tahliyye olunmak matlûbumdur deyicek gıbbe’s-suâl ve’l-inkâr ve akībe’l-istişhâd medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kiremitçi Süleyman Çelebi mahallesi sâkinlerinden olup udûl-i ricâlden olan Şaban Çelebi b. Osman ve Osman Çelebi b. Ali ve yine Şehremîni mahallesinden İsmail Beşe b. Yusuf nâm kimesne li ecli’ş-şehâde makām-ı kazâya hâzırûn olup isre’l-istişhâd fi’l-hakīka müteveffât-ı mezbûre Gülkıyâfet Hâtun hâl-i hayâtında târih-i kitâbdan iki ay mukaddem bizim huzûrumuzda câriye-i memlûkesi müdde‘iye-i mezbûreyi cemî‘ malından ifrâz ve i‘tâk ve tahrîr edip zümre-i harâir-i asliyyâta ilhâk ve idrâc edip min ba‘d üzerinde hakk-ı velâdan gayrı hakkım kalmadı deyû işhâd eyledi biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm mâ hüve’l-vâki‘ ketb olundu. Fi’l-yevmi’t-tâsi‘ min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Hüseyin Çelebi b. Hasan, Ali Beşe b. Emrullah, Musli Bey b. Abdullah, Mehmed Beşe b. Osman, Hüseyin b. Tayyib ve gayruhüm mine’l-hâzırîn.