Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 210 Hüküm no: 210 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer b. Ömer’in menzil, bağ ve tarlalarını Mustafa b. Sinan’a satması Vilâyet-i Rumeli’nde Arnavud Belgradı kazâsına tâbi‘ Şıkloz nâm karye sâkinlerinden Ömer b. Ömer nâm kimesne meclis-i şer‘de işbu râfi‘ü’l-vesîka Mustafa b. Sinan nâm kimesne mahzarında ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkden karye-i mezbûrede vâki‘ bir tarafdan Mehmed Çavuş mülkü ve üç tarafdan tarîk-i âm ile mahdûd bir bâb tahtânî oda ve havluyu müştemil mülk menzilimi cemî‘-i tevâbi‘ ve âmme-i menâfi‘ ile ve yine karye-i mezbûr sınırı dâhilinde vâki‘ bir tarafdan Mehmed Çavuş bağı ve etrâf-ı selâsesi tarîk-i âm ile mahdûd Yolaltı’nda tahmînen sekiz çapalık bir kıt‘a mülk bağımı dahi bi cümleti’l-hukūk ve’l-luhûk mezbûr Mustafa’ya yirmi kıt‘a tâmmü’l-vezn sahîhü’l-ayâr riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i kat‘î ile bi safkatin vâhidetin bâtten bey‘ edip ol dahi vech-i muharrer üzre iştirâ ve kabûl eyledikden sonra yine tefvîz-i âti’z-zikrin sudûruna değin zabt ve taht-ı tasarrufumda olup karye-i mezbûre sınırı dâhilinde mevâzi‘-i müteferrikada vâki‘ hudûdları inde’l-ahâlî ma‘lûm on iki kıt‘a tarlaların hakk-ı tasarruflarını ma‘rifet-i sâhib-i arz ile merkūm Mustafa’ya tâmmü’l-vezn sahîhü’l-ayâr elli kıt‘a riyâlî guruş-ı kebîre tefvîz bi’l-ferâğ eylediğimde ol dahi ber minvâl-i muharrer tefevvüz ve kabûl edip semeni olan [meblağ-ı] mezbûr ile bedel-i merkūm cem‘an yetmiş kıt‘a riyâlî guruşu bi’t-tamâm ve’l-kemâl merkūm Mustafa yedinden alıp kabz edip menzil-i mezbûr ve bağ-ı mersûmu ve mârrü’z-zikr on iki kıt‘a tarlaları mahallinde zabt ve tasarrufa tarafımdan mezbûr Mustafa’yı taslît eyledim min ba‘d emlâk-i merkūme ve arâzi-i mersûmede alâkam kalmadı dedikde gıbbe’t-tasdîki’l-mu‘teber mâ hüve’l-vâki‘ ketb olundu. Fi’l-yevmi’s-sâmin min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Bayram b. Ali, Mahmud b. Ali, Mehmed b. Ali, Hüseyin b. Ali, Ramazan b. Ali, diğer Hüseyin b. Ali, Ahmed b. Hüseyin, Mehmed b. Mustafa, diğer Mehmed b. Mustafa, Ali Beşe b. Emrullah ve gayruhüm mine’l-hâzırîn.