Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 211 Hüküm no: 211 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lazari v. Yasef’in vakıf odalarında oturan Mehmed Çavuş b. Abdullah’a, odayı boşaltması için mühlet verilmesi Yâ Fettâh Havâss-ı Aliyye kazâsına tâbi‘ kasaba-i Hasköy’de vâki‘ Kiremitçi Ahmed Çelebi mahallesinde sâkin iken bundan akdem hâlik olan Lazari v. Yasef nâm yahudi’nin mahalle-i mezbûrede vâki‘ kendiden sonra evlâdına ve evlâd-ı evlâdına ve evlâd-ı evlâd-ı evlâdına ba‘de’l-inkırâz Menahem Yahudi evlâdına ve ol dahi münkariz oldukda yahudi tâifesinin Karayi fukarâsına vakf eylediği menzile taraf-ı şer‘-i şerîfden mansûb mütevellî nasb ve ta‘yîn olunan râfi‘ü’l-kitâb Mehmed Çavuş b. Abdullah nâm mühtedî meclis-i şer‘de menzil-i vakf-ı mezbûrun odasında bilâ-ücret sâkin olan Mehmed Beşe b. Osman nâm kimesne mahzarında üzerine takrîr ve da‘vâ edip hâlâ mütevellîsi olduğum vakf-ı menzil-i mezbûrun bir odasında mezbûr Mehmed, zevcem Fâtıma nâm hâtun vâkıf-ı mezbûrun evlâdındandır deyû bilâ-ücret sâkin olup vâkıf vakfiyesinde süknâ ve tasarrufdan birini tahsîs etmeyecek mütevellî menzil-i vakf-ı mezbûru ecr-i misli ile âhara îcâr ve ücretinden menzil-i mezbûru ta‘mîre kādir olur idiğine yedimde olan fetvâ-yı şerîfe mûcebince mezbûr Mehmed’in odadan ihrâcına tenbîh olunmak bi’t-tevliyye murâdımdır deyû takrîr-i meşrûhuna mutâbık fetvâ-yı şerîfe ibrâz etmeğin mezbûr Mehmed dahi menzil-i vakf-ı mezbûrun bir odasında bilâ-ücret bu âna değin sâkin olduğunu ikrâr ve ihrâc için târih-i kitâbdan üç gün tamâmına değin istimhâl etmeğin taraf-ı şer‘-i şerîfden ber minvâl-i muharrer imhâl olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâl li sene isneteyn ve seb‘în ve elf. Şuhûdü’l-hâl: Fahrü’l-kuzât Hamza Efendi, Fahrü’l-müderrisîn Mahmud Efendi, Fahrü’l-müderrisîn Eyüb Efendi, çukadâr Ali Beşe er-Râcil ve gayruhüm mine’l-hâzırîn.