Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 211 Hüküm no: 212 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mücellâ bt. Abdullah’ın vârislerinin hisselerini Hacı Hüseyin Ağa b. Himmet’e satmaları Havâss-ı Sultâniye kazâsı ahâlîsinden Küçük nâhiyesine tâbi‘ Küçük Nakkaş nâm karyede sâkin iken bundan akdem vefât eden Mücellâ bt. Abdullah nâm hâtunun verâseti, zevci Hasan b. Pîrî ile sulbî kebîr oğlu Mehmed’e ve sadriye kebîre kızı Fâtıma’ya münhasıra olduğu şer‘an zâhir ve müte‘ayyin oldukdan sonra mezbûr Hasan ve Mehmed asâleten ve mezbûre Fâtıma’nın zevci olup bey‘-i âti’z-zikre ve kabz-ı semene tarafından vekîl olup mezbûrenin zâtını ma‘rifet-i şer‘iyye ile ârifân olan sakayân-ı hâssa zümresinden Ali Bey b. Süleyman ve çavuşân-ı dergâh-ı âlî zümresinden İbrahim Bey b. Mustafa şehâdetleriyle şer‘an vekâleti sâbite olan Siyavuş b. Abdullah meclis-i şer‘-i hatîr-i lâzımü’t-tevkīrde işbu sâhibü’l-kitâb fahrü’l-emâsil ve’l-eşbâh Pirinçcibaşı el-Hâc Hüseyin Ağa b. Himmet nâm kimesne mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip mûrisimiz müteveffât-ı mezbûrenin emlâkinden olup ba‘de vefâtihâ bi’l-irsi’ş-şer‘î bize ve sadriye kızı müvekkile-i mezbûre intikāl eden emlâkinden karye-i mezbûrede vâki‘ etrâf-ı erba‘ası tarîk-i âm ile mahdûd bir bâb fevkānî ve bir bâb tahtânî odaları ve bir havuz ve bi’r-i mâ ve kenîf ve zât eşcâr-ı müsmire ve gayr-ı müsmire bahçe ve bir dönüm bir kıt‘a bağı müştemil mülk-i mevrûs menzilimizi, cemî‘-i tevâbi‘ ve levâhıkı ve âmme-i menâfi‘ ve merâfıkı ile ve menzil-i mezbûrda mevcûd iki aded fıçı ve üç küb ve sekiz çeki odun ve yirmi aded tahta ve iki çapa ve üç bel ve iki yastık kılıfı ve bir köhne yorgan ve iki aded minder ve bir kilim ve bir tırpanı bi safkatin vâhide mezbûr el-Hâc Hüseyin Ağa’ya on dört bin dokuz yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bi’l-asâleten ve bi’l-vekâleten bey‘ ve teslîm eylediğimizde ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan mezbûrü’n-na‘t on dört bin akçe[yi] tamamen müşterî-i mezbûr yedinden bi’l-asâle ve bi’l-vekâle alıp kabz [eyledik] dediklerinde gıbbe’t-tasdîki’l-mu‘teber merkūm Hasan meclis-i merkūmda müşterî-i mezbûr el-Hâc Hüseyin Ağa mahzarında ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan karye-i mezbûre bağları dâhilinde bir tarafdan İskender Paşa oğlu tarlası ve bir tarafdan bezci Rıdvan tarlasıyla mahdûd ve bir birine muttasıl bir buçuk dönüm iki kıt‘a mülk harâbe bağlarımı cemî‘ tevâbi‘ ve levâhıkı ile mûmâ-ileyh el-Hâc Hüseyin Ağa’ya bin altı yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bâtten bey‘ ve teslîm ve kabz-ı semen eylediğimde ol dahi iştirâ ve tesellüm ve kabz ve kabûl eyledi ba‘de’l-yevm mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î müteveffâ-yı mezbûrun sulbî kebîr oğlu mezbûr Mehmed dahi meclis-i mezbûrda merkūm el-Hâc Hüseyin Ağa mahzarında ikrâr edip vâlidem müteveffâ-yı mezbûrdan intikāl-i âdî ile bana intikāl edip ilâ hîn-i sadr-ı hâze’t-tefvîz zabt ve taht-ı tasarrufumda olup merhûm Sultan Bayezid Hân-ı Velî [46a] evkāfı arâzisinden lede’l-ahâlî ve’l-cîrân ma‘lûmetü’l-hudûd altı dönüm bir kıt‘a ve Menekşe Çayırı kurbunda Sulak yerinde üç dönüm bir kıt‘a ki iki kıt‘a tarlalarımın hakk-ı tasarruflarını evkāf-ı mezbûre mütevellîsi ma‘rifetiyle mezbûr el-Hâc Hüseyin Ağa’ya sekiz yüz akçe bedel mukābelesinde tefvîz bi’l-ferâğ eylediğimde ol dahi tefevvüz ve kabûl edip bedel-i ferâğ olan sekiz yüz akçeyi tamamen merkūm el-Hâc Hüseyin Ağa yedinden tamamen alıp kabz eyledim ba‘de’l-yevm merkūmun dâhil-i taht-ı tasarrufu olup emsâli gibi mutasarrıf olsun dedikde mâ hüve’l-vâki‘ kayd şüd. Fi’l-yevmi’t-tâsi‘ min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Fahrü’l-emâsil Sakabaşı Hasan Ağa [b.] İbrahim Bey, Mehmed Bey b. Mustafa, Hüseyin Muhzır, Mehmed b. Mahmud, Eyüb Çelebi el-Mukayyid, Mehmed Efendi b. Hasan, Ahmed Beşe Kethüdâ-yı çiftlik, Mehmed Bey el-Cündî ve gayruhüm mine’l-hâzırîn.