Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 213 Hüküm no: 213 Orijinal metin no: [46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaldırımcı Vekac v. Yorgi’nin menzilini kızı Ezmerağda’ya satması Havâss-ı Aliyye kazâsına tâbi‘ kasaba-i Silivri’de Eynebacılar mahallesi sâkinlerinden kaldırımcı Vekac v. Yorgi nâm zimmî meclis-i şer‘-i hatîr-i lâzımü’t-tevkīrde sulbiye kebîre kızı râfi‘atü’l-vesîka Ezmerağda nâm nasrâniye tarafından bey‘-i câ’i’z-zikri tasdîke bimâ hüve nehci’s-sübût şer‘an vekâleti sâbite olan zevci Anastaş v. Gore nâm zimmî muvâcehesinde tav‘an ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede bir tarafdan Kaytas Bey mülkü ve bir tarafdan balıkçı Süleyman oğlu Çelebi mülkleri ve taraf-ı âharı tarîk-i âm ile mahdûd iki bâb fevkānî oda ve bir kileri ve tahtında ahırı müştemil mülk menzilimi cümle tevâbi‘ ve levâhıkı ile kızım müvekkile-i mezbûre Ezmerağda’ya altı bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı kat‘î ile bâtten bey‘ ve teslîm eylediğimde ol dahi minvâl-i muharrer üzre iştirâ ve tesellüm ve kabz ve kabûl edip semeni olan meblağ-ı mezbûr altı bin akçeyi kızım müvekkile-i mezbûre Ezmerağda yedinden tamamen alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh benim alâkam ve medhalim yokdur, kızım müvekkile-i [mezbûrun] mülk-i müşterâsıdır. Keyfe mâ yeşâ’ mutasarrıf olsun deyicek mukırra-i merkūmun minvâl-i meşrûh üzre cârî ve sâdır olan ikrârını vekîl-i mezbûr bi’l-vekâle tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Hüseyin Çelebi b. Mehmed Bey, Mehmed Bey b. Abdullah, Odabaşı İnce Kara, Ali Bey b. Veli Bey, Hüseyin b. Hasan ve gayruhüm mine’l-hâzırîn.