Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 214 Hüküm no: 214 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın câriyesi Peymâne bt. Abdullah’ı âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Zal Paşa câmi‘i kurbunda sâkine Hatice bt. Abdullah nâm hâtun tarafından akd-i âti’z-zikri ikrâra vekîl olup mezbûre Hatice’nin zâtını ma‘rifet-i şer‘iyye ile ârifân olan Hasan b. Süleyman ve Sâlih b. Abdullah nâm birâderler şehâdetleri ile şer‘an vekâleti sâbite olan Abdullah Efendi b. Mehmed nâm vekîl meclis-i şer‘de bi’l-vekâle ikrâr ve takrîr-i kelâm edip müvekkile-i mezbûre Hatice Hâtun’a rıkk-ı sâbıkını mu‘terife olup işbu orta boylu kara kaşlı, kara gözlü, sağ şakīkasında tâ‘ûn alâmeti olup esmerü’l-levn Habeşiyyetü’l-asl müslimiyyetü’l-mille Peymâne bt. Abdullah nâm câriye-i memlûkesini, hasbeten lillâhi’l-aliyyi’l-Azîm ve hasbeten li rûhi resûlihi’l-kerîm cümle malından ifrâz ve i‘tâk ve tahrîr ve zümre-i harâir-i asliyyâta ilhâk ve idrâc edip min ba‘d câriye-i mevsûfe-i mezbûre üzerinde hakk-ı velâdan gayrı hakkım bâkī kalmadı ba‘de’l-yevm sâir harâir-i asliyyât gibi hürre olsun dedi deyû bi’l-vekâle ikrâr edicek hâkim-i muvakki‘-i sadr-ı kitâb hazretleri kıbelinden sıhhat-i ıtk-ı mezbûra hükm birle mâ cerâ bi’l-ibtigā ketb olundu. Fi’l-yevmi’s-sânî aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Süleyman Bey Ser-teberdâr-ı hazret-i Rukiye Sultan, İbrahim Bey b. Abdullah, Veli Bey Pazara giden, çukadâr Ali Beşe, Hamza Efendi nâib-i recül, Mehmed Beşe b. Ahmed Muhzır, Dilâver Bey b. Abdullah, Hüseyin Beşe b. Hasan ve gayruhüm mine’l-hâzırîn. [46a-3]