Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 216 Hüküm no: 216 Orijinal metin no: [46b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marola bt. Todori’nin menzilini Fâtıma bt. Abdullah’a satması Havâss-ı Aliyye kazâsına tâbi‘ Terkos nâhiyesi muzâfâtından Ayvadlı nâm karye sâkinelerinden Marola bt. Todori nâm nasrâniye mahfil-i kazâda işbu râfi‘atü’l-kitâb Fâtıma bt. Abdullah nâm hâtun tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbit olan zevci Mehmed Beşe b. Abdullah nâm kimesne mahzarında ikrâr ve takrîr-i kelâm edip silk-i mülk-i sahîhimde münselik olan emlâkimden karye-i mezbûrede vâki‘ bir tarafdan Dimitri mülkü ve bir tarafdan İstirati mülkü ve bir tarafdan Hüseyin Beşe mülkü ve taraf-ı âharı tarîk-i âm ile mahdûd sakfı sazdan bir bâb tahtânî odayı ve tahmînen bir dönüm mikdârı havluyu ve bir dib pelid eşcârı müştemil mülk menzilimi cümle tevâbi‘ ve levâhıkı ile müvekkile-i mezbûre Fâtıma’ya dört yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t [47a] dört yüz akçeyi müvekkile-i mezbûre Fâtıma Hâtun yedinden tamamen alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh benim alâka ve medhalim yokdur, mezbûr Fâtıma Hâtun’un mülk-i müşterâsıdır, keyfe mâ yeşâ’ mutasarrıfe olsun dedikde mukırra-i mezbûreyi ikrâr-ı meşrûhasında vekîl-i mezbûr bi’l-vekâle tasdîk ve tahkīk edicek mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Hüseyin Beşe b. Abdullah, Topal Hasan Beşe b. Abdullah, Mehmed Efendi b. Hasan, Mustafa Çelebi b. Mehmed ve gayruhüm mine’l-hâzırîn.