Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 217 Hüküm no: 217 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Beşe b. Receb’in vefat eden kadı Mehmed Efendi’nin borcuna kefil olduğu Mahrûse-i İstanbul’da vâki‘ Hâfız câmi‘i kurbunda sâkin râfi‘atü’l-kitâb Halil Beşe b. Receb nâm râcil meclis-i şer‘-i hatîr-i lâzımü’t-tevkīrde vilâyet-i Rumeli’nde Opar nâm kasabada kadı iken bundan akdem vefât eden Mehmed Efendi b. Süleyman nâm müteveffânın zevcesi Vildan bt. Abdullah nâm hâtun mahzarında üzerine takrîr-i kelâm ve ta‘bîr ani’l-merâm edip bundan akdem mezbûre Vildan Hâtun’un zevci müteveffâ-yı mezbûr Mehmed Efendi târih-i kitâbdan bir sene mukaddem hâssa bostânîlerinden Hasan Ağa nâm kimesne yedinden on bin akçe istikrâz ve kabz edip müteveffâ-yı mezbûrun emriyle meblağ-ı mezbûrun nısfını ben ve nısf-ı âharını zevcesi merkūm Vildan dâyin-i mezbûra edâ ve teslîm, emr ve kabûlü hâvî kefâlet-i sahîha-i şer‘iyye ile kefîl olmuşdur hâlâ suâl olunup merkūme Vildan Hâtun’un takrîr[i] tahrîr olunmak murâdımdır deyicek gıbbe’s-suâl mezbûre Vildan Hâtun cevâbında fi’l-hakīka hâl minvâl-i muharrer üzre olup meblağ-ı mezbûrun nısfını ben ve nısf-ı âharını mezbûr Halil Beşe dâyin-i merkūma edâ ve teslîme emr ve kabûlü hâviye kefâlet-i sahîha-i şer‘iyye ile kefîl olmuşuzdur deyû bi tav‘ihâ ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Ali Odabaşı b. Mehmed, Hüseyin Beşe b. Hayreddin, Musa Beşe b. Veli, Mehmed Beşe b. Süleyman, Ali Beşe Çukadâr ve gayruhüm mine’l-hâzırîn.