Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 218 Hüküm no: 219 Orijinal metin no: [47a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülistan bt. Abdullah’ın evini Nazperver Mahallesi Mescidi Vakfı’na istiğlâl yoluyla satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Aşçıbaşı mahallesi sâkinlerinden Gülistan bt. Abdullah nâm hâtun tarafından husûs-ı câ’i’z-zikri ikrâra vekîl olup mezbûreyi ma‘rifet-i şer‘iyye ile ârifân olan Mehmed b. Abdullah ve Ali b. Abdullah nâm kimesneler şehâdetleriyle şer‘an vekâleti sâbite olan zevci Haydar Beşe b. Abdullah meclis-i şer‘de yine medîne-i mezbûrda Nazperver mahallesi Mescidi vakfı’na bi’l-fi‘l mütevellî olan râfi‘ü’l-kitâb Davud Halîfe b. Mehmed mahzarında bi’l-vekâle ikrâr ve takrîr-i kelâm edip zevcim müvekkile-i mezbûre Gülistan’ın emlâkinden olup mahalle-i mezbûrede vâki‘ bir tarafdan Hamza Beşe mülkü ve bir tarafdan Musli Beşe mülkü ve bir tarafdan Taşcı Kasım vakfı ve bir tarafdan tarîk-i âm ile mahdûd mülk menzilini cümle tevâbi‘ ve levâhıkı ile mütevellî-i mezbûr Davud Halîfe’ye alâ tarîki’l-istiğlâl dört bin akçeye bey‘ ve teslîm edip ol dahi mâl-ı vakf-ı mezbûr ile tarîk-i mezbûr üzre iştirâ ve kabûl eyleyip kabz-ı semen-i ma‘dûd ve teslîm-i mahdûd kıldığımdan sonra menzil-i mahdûd-ı mezkûru ba‘de’t-tahliyyeti’ş-şer‘iyye târih-i kitâb şehri [47b] gurresinden beher senesi altışar yüz akçeden üç senede cem‘an bin sekiz yüz akçe ücret ile bana îcâr ve teslîm, ben dahi vech-i meşrûh üzre istîcâr ve tesellüm ve kabz ve kabûl eyledim dedi deyû bi’l-vekâle ikrâr etmeğin gıbbe’t-tasdîki’l-mu‘teber yine menzil-i mahdûd-ı mezkûrun derkine ve ücret-i mersûme ve asl-ı mâlın küllîsine meclis-i mezbûrda merkūm Haydar Beşe ile Hamza Beşe b. Mehmed emr ve kabûlü hâviye kefâlet-i sahîha-i şer‘iyye ile her biri kefîl olmağın mütevellî-i mezbûr Davud Halîfe dahi ba‘de’l-kabûl mâ cerâ bi’l-ibtigā sebt olundu. Fi’l-yevmi’s-sâlis aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Abdurrahman Çelebi b. Mustafa, Ramazan Çelebi el-Attâr, Mehmed Efendi b. Sefer, Abdi Çelebi b. Mustafa, Hüseyin b. Hasan ve gayruhüm mine’l-hâzırîn.