Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 219 Hüküm no: 220 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo ve ortağı Yorgi v. İstati’nin vakıf bostan içindeki meyve ağaçlarını Ali Beşe b. Aydın’a satmaları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Zal Mahmud Paşa câmi‘i kurbunda vâki‘ arsası Ali Paşa vakfı’ndan olup hâlâ icâre-i mu‘accele ve müeccele ile sâbıkan Şâm-ı Şerîf’de mesned-nişîn-i şerî‘at-ı garrâ olan a‘lemü’l-ulemâ’i’l-izâm efdalü’l-fuzalâ’i’l-fihâm Ahmed Efendi hazretlerinin taht-ı tasarruflarında olan inde’l-ahâlî ve’l-cîrân ma‘lûmetü’l-hudûd bostanın müste’cirleri olan Dimo v. Yorgi ve şerîki Yorgi v. İstati nâm zimmîler meclis-i şer‘de işbu râfi‘ü’l-kitâb Ali Beşe b. Aydın mahzarında her biri ikrâr ve takrîr-i kelâm edip hâlâ müste’cirleri olduğu bostanın içinde mevcûd olan eşcâr-ı müsmire ve gayr-ı müsmire ekseri sâlihü’l-ekl ve gayrı sâlihü’l-ekl meyveleri asma üzümünden mâ‘adâsını bi safkatin vâhidetin mezbûr Ali’ye on beş bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î bâtten bey‘ eylediğimizde ol dahi minvâl-i muharrer üzre iştirâ ve kabûl edip semeni olan meblağ-ı mezbûr on beş bin akçeyi mezbûr Ali Beşe yedinden tamamen alıp kabz eyledik ba‘de’l-yevm sâlifü’z-zikr bostan içinde mevcûd olan eşcâr-ı müsmire-i mütenevvi‘anın vech-i muharrer üzre ekseri ekle sâlih ve gayr-ı sâlih [e]smârının asmadan gayrısında bizim vechen mine’l-vücûh alâka ve medhalimiz yokdur, mezbûr Ali Beşe’nin mülk-i müşterâsı olmuşdur. Keyfe mâ yeşâ’ mutasarrıf olsun dediklerinde gıbbe’t-tesâduki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Hüseyin Beşe b. Mahmud, Halil Beşe b. Mehmed, Musli Bey b. Abdullah, Mehmed Çelebi b. Ahmed ve gayruhüm mine’l-hâzırîn.