Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 220 Hüküm no: 221 Orijinal metin no: [47b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Hasan’ın mülk menzilini Mehmed Beşe b. İbrahim’e satması Dârü’l-hilâfeti’l-aliyye Kostantıniyye el-mahmiyye’de vâki‘ Emin Sinan mahallesi sâkinlerinden Hüseyin Çelebi b. Hasan nâm kimesne mahfil-i şer‘de işbu râfi‘ü’l-kitâb Mehmed Beşe b. İbrahim nâm kimesne mahzarında tav‘an ikrâr ve takrîr-i kelâm edip Havâss-ı Aliyye kazâsına tâbi‘ Silivri nâhiyesinde vâki‘ Küçükkılıçlı nâm karyede sâkin iken bundan akdem vefât eden Baba Hasan nâm müteveffâdan bi’l-irsi’ş-şer‘î bana isâbet ve intikāl eden emlâkden olup karye-i mezbûrede vâki‘ üç tarafları müşterî-i mezbûr Mehmed Beşe’nin mülkü ve bir tarafdan tarîk-i âm ile mahdûd bir kıt‘a çatma dam ve bir mikdâr havluyu müştemil mülk-i mevrûs menzilimi cümle tevâbi‘ ve levâhıkı ile mezbûr Mehmed Beşe’ye beş bin sekiz yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm edip ol dahi minvâl-i muharrer üzre iştirâ ve tesellüm ve kabz ve kabûl eyleyip semeni olan meblağ-ı mezbûr beş [bin] sekiz yüz akçeyi müşterî-i mezbûr Mehmed Beşe yedinden tamamen alıp kabz eyledim ba‘de’l-yevm sâlifü’z-zikr menzil-i mahdûd-ı mezkûrda vechen mine’l-vücûh benim alâka ve medhalim yokdur, müşterî-i mezbûr Mehmed Beşe’nin mülk-i müşterâsı olmuşdur, keyfe mâ yeşâ’ mutasarrıf olsun dedikde mukırr-ı merkūmun vech-i mübeyyen üzre cârî ve sâdır olan ikrârını merkūm Mehmed Beşe vicâhen tasdîk ve tahkīk etmeğin mâ hüve’l-vâki‘ kayd şüd. Fi’l-yevmi’s-sâlis aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Yahya Çelebi b. Receb, Receb Çelebi b. Hasan, Mehmed Beşe b. Abdullah, Hüseyin Çelebi b. Ali, Ali Çelebi b. Abdullah, Haydar Kethüdâ b. Abdullah.