Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 220 Hüküm no: 222 Orijinal metin no: [48a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Kominoz’un kendisini yanlışlıkla döven Mehmed b. Süleyman aleyhinde açtığı davanın anlaşmayla sonuçlandığı Yâ Fettâh Husûs-ı âti’l-beyânın mahallinde tahrîri iltimâs olunmağın küttâb-ı mahkeme-i şerîfeden mevlânâ Sâlih Mehmed Efendi b. Mehmed irsâl olunup ol dahi zeyl-i sahîfede muharrerü’l-esâmî olan müslimîn ile Havâss-ı Aliyye kazâsı aktâ‘ından Alibeyköy karyesinde vâki‘ Filköprüsü yanında hâlâ hâssa ahır kethüdâsı olup mîrî çayır çeken arabacılar ve tırpancıların zâbiti olan umdetü’l-emâcid ve’l-ekârim câmi‘ü’l-mehâmid ve’l-mekârim Ali Ağa haymesinde akd-i meclis-i şer‘-i şerîf eylediğinde hâlâ mîrî çayır çeken arabacılardan olup Havâss-ı mezbûre a‘mâlinden Silivri nâhiyesine tâbi‘ Bigados nâm karye zimmîlerinden Yani v. Kominoz nâm zimmî meclis-i ma‘kūd-ı mezkûrda, kıdvetü’l-muhadderât zübdetü’l-muvakkarât mükerreme Ayşetü’d-dehr Fâtımatü’z-zamân Gevherhan Sultan -dâmet ismetühâ- hazretlerinin arabacılarından sâhibü’l-kitâb Mehmed b. Süleyman mahzarında ikrâr ve takrîr-i kelâm edip târih-i kitâbdan bir gün mukaddem Kâğıdhâne kurbunda Papa Harmanı demekle ma‘lûm mahalde mîrî çayırda ben kendi hâlimde dururken âhar kimesnenin öküzü çayıra girmekle öküzü benim zan edip beni bi gayri hakkın değnek ile başımı darb ve arka ve kolumu kara bere edip beni mecrûh etmekle ben dahi husûs-ı mezbûru da‘vâ ve mûcebini icrâ murâd eylediğimde merkūm dahi inkâr ile cevâb vermeğin beynimizde münâza‘ât-ı kesîre cereyân etmişidi el-hâletü hâzihî beynimizde muslihûn tavassut edip da‘vâ-yı mezkûremden merkūm Mehmed ile beni beş kıt‘a riyâlî guruş-ı kebîr tâmmü’l-vezn bi hesâb-ı âharda altı yüz nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t beş kıt‘a riyâlî guruşu tamamen merkūm Mehmed yedinden alıp kabz edip husûs-ı mezbûra müte‘allik cemî‘ de‘âvî ve mütâlebât ve eymân ve muhâsamâtdan zimmetini ibrâ ve iskāt eyledim min ba‘d merkūm ile vechen mine’l-vücûh da‘vâ ve nizâ‘ım yokdur deyicek gıbbe’t-tasdîki’l-mu‘teber vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ cerâ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Pîrî Çelebi b. Mehmed, Mustafa Beşe b. Osman seroda, Mehmed Bey b. Ali Sarac-ı hâssa, Mustafa Bey b. Ahmed Sarac-ı hâssa, Ahmed Bey b. Ali Sarac-ı hâssa ve gayruhüm mine’l-hâzırîn.