Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 221 Hüküm no: 223 Orijinal metin no: [48a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed Beşe’ye Mehmed b. Abdullah’ın vasî tayini Havâss-ı Aliyye kazâsı tevâbi‘inden Terkos nâhiyesine tâbi‘ Ormanlı nâm karyede sâkin iken bundan akdem vefât eden Mehmed Beşe b. Mahmud nâm müteveffâ zevcesi Ümmühâni bt. Haydar nâm hâtun ve sulbiye sagīre kızı Fâtıma’yı terk edip lâkin zevcesi mezbûr Ümmühâni’nin müteveffâ-yı mezbûrdan hamli olmağın İmâm Ebû Yusuf’dan rivâyet eylediği kavl-i mu‘teber ve müftâlar üzre tereke-i meyyitden haml-i mezbûr için alıkonulan ibn-i vâhid hissesini ve sagīre-i mezbûreye babası müteveffâ-yı mezbûrdan bi’l-irsi’ş-şer‘î isâbet ve intikāl eden malını zabt ve sagīre-i mezbûrenin her hâlini hıfz için evân-ı rüşd ve hadd-i bülûğuna değin bir vasî nasb ve ta‘yîn olunmak lâzım ve mühim olmağın hâkim-i muvakki‘-i sadr-ı kitâb hazretleri dahi işbu râfi‘ü’[l-kitâb] Mehmed b. Abdullah nâm kimesneyi vasî nasb ve ta‘yîn buyurmağın ol dahi vesâyet-i mezbûreyi kabûl ve hıdemât-ı lâzımesin edâya müte‘ahhid oldukdan sonra hâkim-i mûmâ-ileyh -esbağallâhu ni‘amehû aleyh- hazretleri karye-i [mezbûr] sükkânından mezbûre Ümmühâni’nin babası merkūm Haydar ve Davud Beşe b. İsâ ve Bayram Beşe b. Yunus ve sarac-ı hâssa zümresinden Karagöz Mustafa Beşe nâm kimesneleri vasiyy-i merkūm üzerine hasbî nâzırlar nasb ve ta‘yîn ve vasiyy-i mezbûra zikr olunan nüzzâr ma‘rifetsiz bir nesneye mübâşeret etmemek üzre tenbîh buyurmağın ol dahi nezâret-i mezbûreyi kabûl ve hıdemât-ı lâzımesin edâya her biri müte‘ahhid olmağın mâ hüve’l-vâki‘ kayd şüd. Fi’l-yevmi’s-sâlis aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Bayram b. Ahmed, Ali Beşe Çukadâr, Hüseyin Muhzır, Sefer Çelebi b. Mehmed, Mehmed Çelebi Zağralı, İbrahim Beşe b. Kurd, Ali Ağa b. Abdullah ve gayruhüm mine’l-hâzırîn.