Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 298 Hüküm no: 334 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed Beşe b. Receb’in vârislerinin terekeyi almak için Derviş Ahmed b. Ali’yi vekil tayin ettikleri Mahmiye-i İstanbul’da Hâfız Paşa mahallesinde sâkin işbu bâ‘isü’l-kitâb Derviş Ahmed b. Ali nâm kimesneden vech-i âtî üzre da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-i müslimînden mahmiye-i mezbûrede Esirhanı sükkânından Hasan b. Mehmed ve Mehmed b. Mustafa ve medîne-i Üsküdar’da Yenimahalle’de sâkin Ali b. Abdi nâm kimesneler meclis-i şer‘-i şerîfe hâzırûn olup her biri edâ-i şehâdet edip fi’l-asl vilâyet-i Anadolu’da Bolu sancağında Dirgine kazâsına tâbi‘ Kazancı nâm karye ahâlîsinden olup mahrûse-i Galata mahallâtından Arab Câmi‘i mahallesinde mutavattın olup vilâyet-i mezbûrede medîne-i Balıkesir’de ticâretle müsâfiren sâkin iken fevt olan Mehmed Beşe b. Receb’in li ebeveyn kız karındaşları ve vâriseleri olan Selime ve Ünzile nâm hâtunlar müteveffâ-yı mezbûrun zâhirde vâris-i ma‘rûfu olmamak zu‘muyla terekesine bi’l-emâne vâzı‘ü’l-yed olup mahmiye-i mezbûrede zümre-i râcilînin bi’l-fi‘l beytülmâl emîni olan fahrü’l-akrân ( ) yedinden tereke-i merkūmeyi da‘vâ ve talebe ve ahz u kabza kendiye îsâle ve lede’l-hükkâmi’l-kirâm mürâfa‘a ve muhâsamaya ve redd-i cevâba taraflarından mezbûr Derviş Ahmed’i bizim huzûrumuzda vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve merâsimini edâya müte‘ahhid oldu biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, İbrahim Çelebi b. Mehmed, Hasan Çelebi b. Hüseyin.