Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 228 Hüküm no: 230 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın muhâlaa yoluyla boşandığı ancak iddet süresini doldurmadan vefat eden karısının mirasından hak iddiasının reddi Mahmiye-i İstanbul’da Kocamustafapaşa semtinde sâkin el-Hâc Mehmed b. Abdullah nâm kimesne meclis-i şer‘de medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Düğmeci odalarında sâkin bâ‘isü’l-kitâb Fâtıma bt. Yusuf nâm hâtun mahzarında üzerine takrîr-i da‘vâ edip bundan akdem zevcem olup târih-i kitâbdan iki ay mukaddem fevt olan Ayşe nâm hâtun mezbûre Fâtıma’nın li ebeveyn hemşîresi olmağın mecmû‘ muhallefâtına vaz‘-ı yed edip benim nısf hisse-i şer‘iyyemi teslîmde ta‘allül eder suâl olunup alıverilmek matlûbumdur deyicek gıbbe’s-suâl mezbûre Fâtıma cevâbında fi’l-hakīka hemşîrem müteveffât-ı mezbûre müdde‘î-i mezbûrun zevcesi idi lâkin fevt olmazdan mukaddem hemşîrem müteveffât-ı mezbûre zevci merkūm zimmetinde mütekarrir olan bin akçe mehr-i müeccelinden ve nafaka ve me’ûnet-i süknâsından fâriğa olduğundan mâ‘adâ iki yastık, bir yorgan ve bir döşek ve bir minder bedel-i hul‘ olmak üzre zevci müdde‘î-i mezbûre def‘ ve teslîm ve muhâla‘a eyleyip ol dahi kabz ve hul‘-ı mezbûru mahzar-ı şuhûdda kabûl edip ahadühümâ zevciyyete müte‘allik âmme-i de‘âvîden âharın zimmetini ibrâ-i âm ile ibrâ eylemişdir emr şer‘-i şerîfin deyicek isre’l-istintâk müdde‘î-i mezbûr cevâbında fi’l-hakīka hâl vech-i muharrer üzre olmuşidi lâkin bedel-i hul‘-ı mezkûrdan bir yastık ve kendi esvâbımdan dahi iki aded dokuma makramam müteveffât-ı mezbûre yedinde kalmışdır ve bundan mâ‘adâ mezbûre Ayşe iddeti münkaziye olmadan fevt olmuşdur, ben dahi mezbûreye vâris olup binâen-aleyh muhallefâtının nısfını hemşîresi merkūme Fâtıma’dan taleb ederim deyicek gıbbe’l-istifsâr merkūm Fâtıma müdde‘î-i mezbûrun hemşîresi müteveffât-ı mezbûre yedinde bedel-i hul‘dan bir yastık ve kendi esvâbından iki dokuma makraması kaldığını ikrâr etmeğin kable’l-inkızâ’i’l-idde fevt olan zevceyn talâk-ı ric‘îden mâ‘dâsında ahadühümâ âhara vâris olmamağın müdde‘î-i merkūm bî-vech ta‘arruzdan men‘ ve merkūm Fâtıma’ya dahi ikrâr eylediği yastık ve iki dokuma makramayı müdde‘î-i mezbûra teslîme tenbîh olunup mâ cerâ bi’l-ibtigā ketb olundu. Fi’l-yevmi’s-sâlis aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Halil Çelebi b. Abdülmu‘tî, Osman Efendi el-İmâm, el-Hâc Ali Beşe er-Râcil, Mehmed Çelebi b. Mehmed, Mustafa Çelebi b. Hüsameddin ve gayruhüm mine’l-hâzırîn.