Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 229 Hüküm no: 231 Orijinal metin no: [50a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın icâreteyn ile tasarrufunda olan menzil için hüccet talep etmesi Havâss-ı Aliyye tevâbi‘inden kasaba-i Hasköy’de Kiremitçi Ahmed Çelebi mahallesi sâkinelerinden bâ‘isetü’l-kitâb Fâtıma bt. Abdullah nâm mühtediye meclis-i şerî‘at-ı şerîfede takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan Haydar Yahudi mülkü ve bir tarafdan Menahem Yahudi vakfı ve tarafeyni tarîk-i âm ile mahdûd ve büyût-ı adîdeyi müştemil olan menzili, cemî‘ tevâbi‘ ve levâhıkı ile ben şeref-i İslâm ile müşerrefe olmazdan mukaddem hâlik olan babam İlyazer nâm yahudi vakf ve haps edip vakf-ı mezbûrun esnâ-i beyân-ı şürûtunda menzil-i mezbûru kendimden sonra evlâdıma ve evlâd-ı evlâdıma ve evlâd-ı evlâd-ı evlâdıma ba‘de’l-inkırâz ağam Menahem evlâdına ba‘dehüm Edirne Cemâ‘atinden mahmiye-i İstanbul’da sâkin Karayi fukarâsına şart eyledi deyip lâkin süknâ ve tasarrufdan birini beyân etmemekle menzil-i mezbûr ber mûceb-i fetvâ-yı şerîf yed-i mütevellî ve ecr-i misli ile îcâr olunup icâresinden bir mikdârı menzil-i mezbûrun ta‘mîr [ve] termîmine harc ve sarf olunup [50b] evlâd beyninde tevzî‘ lâzım gelmeğin vakf-ı mezbûre kıbel-i şer‘den mütevellî olan Mehmed Bey b. Abdullah nâm mühtedî menzil-i mezbûru tâlibîne arz eylediğinde on altı bin akçe icâre-i mu‘accele ve yevmî on iki akçe icâre-i müeccele ile benim üzerimde karâr edip ziyâde ile tâlib-i âhar zuhûr etmemeğin mütevellî-i mezbûr dahi menzil-i mezbûru bana ber minvâl-i muharrer îcâr etmeğin ben dahi istîcâr ve kabûl eylediğimden sonra ücret-i müeccele-i mezkûrenin yevmî dört akçesi menzil-i mezbûr ta‘mîr ve termîmi için yed-i mütevellîde hıfz olunup bâkī yevmî sekiz akçe vâkıf-ı mezbûrun evlâdı beyninde tevzî‘ ve taksîm olunmak üzre işbu târih-i kitâb şehrinin on üçüncü günü târihiyle müverrah ve mütevellî-i mezbûr imzâsıyla mümzâ ve hatmiyle mahtûm yedime temessük vermişdir el-hâletü hâzihî mütevellî-i mezbûrun yedimde olan temessüküne nazar olunup cânib-i şerî‘at-ı mutahharadan dahi mûcebince istihkâmen hüccet-i şer‘iyye verilmek matlûbumdur deyû târih-i mezbûr ile müverrah ve mütevellî-i mezbûr imzâsıyla mümzâ ve hatmiyle mahtûm min külli’l-vücûh takrîrine muvâfık ve müdde‘âsını nâtık temessük ibrâz etmeğin mûcebince kıbel-i şer‘den dahi li ecli’l-istihkâm işbu vesîka-i enîka bi’l-ibtigā sebt [ve] imlâ olundu. Fi’l-yevmi’l-hâmis aşer min Şevvâli’l-mükerrem min şühûri sene isneteyn ve seb‘în ve elf. Şuhûdü’l-hâl: Mehmed Efendi b. Hasan, Hüseyin Muhzır, Dilâver Muhzır, Mehmed b. Mahmud, Ali Beşe b. Emrullah ve gayruhüm mine’l-hâzırîn.