Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 230 Hüküm no: 232 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musli b. Sâlih ve kardeşinin vârislerinin çiftlik hisselerini Mustafa b. Hamza’ya kiralamaları Vilâyet-i Anadolu’da Kastamonu livâsı aktâ‘ından Geynülü? kazâsına tâbi‘ İmâmlı nâm karye sâkinlerinden Musli b. Sâlih nâm kimesne kendi tarafından asâleten ve karındaşı Ali nâm müteveffânın sulbî kebîr oğlu Mehmed nâm kimesne tarafından ikrâr-ı âti’z-zikre vekîl olup medîne-i Eyüb’de Kayıkçılar odalarında mütemekkin Mehmed b. Abdünnebî ve Dursun b. Halil nâm kimesneler şehâdetleriyle şer‘an vekâleti sâbite olup vekâleten ve müteveffâ-yı mezbûr Ali’nin âhar sulbî sagīr oğlu Veli nâm yetîmin tesviye-i umûru için kıbel-i şer‘-i kavîmden mansûb vasîsi olan vâlidesi Fâtıma bt. Halil nâm hâtun vesâyeten meclis-i şer‘de işbu bâ‘isü’l-vesîka Mustafa Efendi b. Hamza nâm kimesne mahzarında bi’l-asâle ve bi’l-vekâle ve bi’l-vesâye ikrâr-ı tâm ve takrîr-i kelâm edip mârrü’z-zikr İmâmlı nâm karye sınırı dâhilinde vâki‘ olup babam müteveffâ-yı mezbûrdan bana ve karındaşım müteveffâ-yı mezbûra irsen intikāl edip Hösükde? demekle ma‘lûm çiftlik-i mezbûre mülhak olup babam mezbûrdan intikāl-i âdî ile bana ve karındaşım mezbûra intikāl eden arâziden hisse-i şer‘iyyemi asâleten ve karındaşım müteveffâ-yı mezbûrdan oğlu mezbûr Mehmed’e isâbet ve intikāl eden hissesini vekâleten ve sagīr-i mezbûrun hissesini vesâyeten lâzım gelen meremmâtını kendi malından edip ve sene [be] sene öşür ve resmini sipâhisine edâ ve teslîm etmek üzre mezbûr Mustafa Efendi’yi senede on beş akçe icâre ile îcâr eylediğimizde o dahi ber minvâl-i muharrer istîcâr ve kabûl eyledi ba‘de’l-yevm çiftlik-i mezbûrun odalarının sâir mevâzi‘inin lâzım olan meremmâtını kendi malından edip ve hâsıl olduğu öşür ve resmini sipâhisine sâl-be-sâl edâ ve teslîm edip çiftlik-i mezbûra mutasarrıf olup beher sene icâre-i mezkûreyi edâ ede dediklerinde gıbbe’t-tasdîk ve’l-kabûl mâ hüve’l-vâki‘ alâ vukū‘ihî kayd şüd. Fî 15 Şevvâli’l-mükerrem li sene isneteyn ve seb‘în ve elf. Şuhûdü’l-hâl: El-Hâc Himmet Efendi b. Abdurrahman el-Kadı, Hamza Efendi nâib-i recül, Zeynelâbidin b. Halil, Abdüsselâm b. Abdurrahman ve gayruhüm mine’l-hâzırîn.