Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 232 Hüküm no: 234 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın kardeşi Fâtıma’daki kira alacağını hibe etmesi Havâss-ı Aliyye kazâsı tevâbi‘inden kasaba-i Hasköy’de Kiremitçi Ahmed Çelebi mahallesi sâkinlerinden Mehmed b. Abdullah nâm mühtedî meclis-i şer‘de li ebeveyn kız karındaşı râfi‘atü’l-kitâb Fâtıma bt. Abdullah nâm mühtediye mahzarında ikrâr ve takrîr-i kelâm edip bundan esbak ben ve hemşîrem mezbûre Fâtıma şerefü’l-İslâm ile müşerref olmazdan mukaddem hâlik olan babam İlyazer v. Yahudi hâl-i hayâtında kendisine, ba‘dehû evlâdına ve evlâd-ı evlâdına ve evlâd-ı evlâd-ı evlâdına ba‘de’l-inkırâz ağam Menahem Yahudi evlâdına ba‘dehüm Edirne cemâ‘atinden mahmiye-i İstanbul’da ve etrâfında sâkin Karayi fukarâsına vakf-ı sahîh-i lâzım ile vakf ve haps eylediği menzil-i ma‘lûmü’l-hudûdun esnâ-i beyân-ı şürûtunda, galle ve süknâdan birini ta‘yîn ve tahsîs etmemekle menzil-i mezbûr yed-i mütevellî ve ecr-i misli ile îcâr olunup icâresinden ta‘mîr [ve] termîmine harc ve sarf olundukdan sonra bâkī kalanı evlâd-ı mutasarrıf olmak üzre vârid olan fetvâ-yı şerîfe mûcebince hâlâ menzil-i vakf-ı mezbûra kıbel-i şer‘den mütevellî nasb ve ta‘yîn olunan Mehmed Bey b. Abdullah nâm mühtedî menzil-i vakf-ı mezbûru ba‘de’l-müzâyede ve inkıtâ‘i’r-rağbe hemşîrem mezbûre Fâtıma’ya on altı bin fıddî nakd-i râcî fi’l-vakt akçe icâre-i mu‘accele ve yevmî on iki akçe ücret-i müeccele ile îcâr ve teslîm, ol dahi ber minvâl-i muharrer istîcâr ve tesellüm ve kabz ve kabûl eylediğinden sonra zikr olunan on altı bin akçe-i mu‘accele hemşîrem mezbûre ile beynimizde tansîf olunup ve müeccele-i mezkûrenin yevmî dört akçesini menzil-i mezbûrun meremmâtı için yed-i mütevellîde hıfz ve yevmî dörder akçesine ben mutasarrıf olup ve dörder akçesine hemşîrem mezbûre Fâtıma mutasarrıfe olmak üzre kabûl ve ittifâk ve mütevellî-i mezbûr dahi minvâl-i me[şr]ûh üzre yedine mümzâ ve mahtûm temessük vermişidi el-hâletü hâzihî hemşîrem mezbûreye zimmetimde menzil-i mezbûrun kirâsından olan sekiz bin akçe deynime mu‘accele-i mezkûreden benim hisseme isâbet eden sekiz bin akçemi takās eylediğimde ol dahi mukāssa ve kabûl ve müeccele-i mezkûreden dahi hisseme isâbet eden yevmî dörder akçenin ikişer akçesini kendi rızâ ve hüsn-i ihtiyârım ile hemşîrem mezbûra teberru‘ edip mâdâmki menzil-i mezbûr hemşîrem mezbûrenin taht-ı icâresinde ola yevmî iki akçeden ziyâde olmamak üzre kavl ü karâr ve ahd ü mîsâk eylemişimdir deyicek gıbbe’t-tasdîk mâ hüve’l-vâki‘ ketb olundu. Fi’l-yevmi’s-sânî aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Muharrirü’l-hurûf Mehmed b. Hasan, Hüseyin Muhzır, Mehmed b. Mahmud Muhzır, Dilâver muhzır ve gayruhüm mine’l-hâzırîn.