Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 233 Hüküm no: 235 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ase v. Kirkor’un, Asvador v. Arzuman aleyhindeki alacak davasında sulh olunması Medîne-i Hazret-i Eyyûb’da vâki‘ Baba Haydar mahallesinde sâkin tüccâr tâifesinden Ase v. Kirko[r] nâm Ermeni mahfil-i kazâda meyhâneci tâifesinden işbu râfi‘ü’l-vesîka Asvador v. Arzuman nâm Ermeni muvâcehesinde ikrâr ve takrîr-i kelâm edip mezbûr Asvador’un babası olup bundan akdem hâlik-i mezbûr Arzuman zimmetinde cihet-i deyn-i şer‘îden babam hâlik-i mezbûr Kirkor’un iki yüz elli guruşu olup kable’l-ahz mürd olmağla meblağ-ı mezbûr bana isâbet ve intikāl etmekle ben dahi meblağ-ı mezbûru hâlik-i merkūmun oğlu mezbûr Asvador’dan taleb ve da‘vâ eylediğimde ol dahi inkâr ile cevâb vermeğin beynimizde münâza‘ât-ı kesîre cereyân etmişidi el-hâletü hâzihî beynimizde muslihûn tavassut edip meblağ-ı mezbûr da‘vâsından beni mezbûr Asvador ile yirmi beş guruş üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûru merkūm Asvador yedinden tamamen alıp kabz edip min ba‘d meblağ-ı mezbûr da‘vâsına müte‘allik merkūm Asvador ile da‘vâ ve nizâ‘ım yokdur, husûs-ı mezbûrdan merkūmun zimmetini ibrâ ve iskāt eyledim dedikde gıbbe’t-tasdîk [mâ hüve’l-vâki‘ ketb olundu]. Fi’l-yevmi’s-sânî aşer min Şevvâli’l-mükerrem li sene isneyn ve seb‘în ve elf. Şuhûdü’l-hâl: Kaytas Bey b. Memi, Ali Çelebi b. Rıdvan, Durmuş Çelebi b. Abdülmuttalib, Mehmed Çelebi b. Ahmed, Hüseyin Beşe b. Mustafa, Papas v. İsak, Bogos v. Avanos, Avanos v. Serkis, Mercan v. Murad.